Oppo Ace 2 намойиш қилинди: кўп томонлама рекордчи флагман!

  •   DiMaX
  •  1006
  •  14.04.2020 12:09

Oppo Ace 2 намойиш қилинди: кўп томонлама рекордчи флагман!

Хитойлик сермаҳсул смартфонсозлардан бўлмиш Oppo компанияси яқиндагина Find X2 ҳамда Find X2 Pro флагманларини намойиш қилган эди. булардан иккинчиси AnTuTu бенчмаркининг энг қудратли смартфонлар ўнталигида етакчи бўлган.

ЎҚИНГ: Энг зўр флагманларда энг кераксиз ва ҳатто зарарли бир функция бор!

Компания энди яна битта флагман модели – Oppo Ace 2 смартфонини тақдим этди. Ҳа, пайқаганингиздек, унинг номидан аввалги смартфонларда бўлган Reno қисми олиб ташланган.

Oppo кечагина эълон қилган видеода кўрганимиздек, Ace 2 флагмани ҳатто AnTuTu етакчиси – Find X2 Pro моделидан ҳам ошиқ, яъни 627 553 балл билан рекорд ўрнатган! Шунингдек, тақдимотда маълум бўлишича, у симли усулда 65 ваттлик технология асосида тезкор қувватланувчи дунёдаги илк смартфондир.

Шу билан бирга, Oppo Ace 2 симсиз усулда ҳозиргача бозорга чиққан моделлар орасида энг юқори – 40 ваттлик асосда қувватлана олади. Яна бир жиҳати, унинг ўзи бошқа қурилмаларга 10 ваттлик технология бўйича симсиз заряд бера олади. Яъни, Ace 2 – қувватлашнинг барча вариантларига эга ҳамда етарлича бақувват ягона смартфондир.

ЎҚИНГ: Дунёдаги энг кучли смартфон, процессор ва прошивкалар ТОП-ўнталиклари (Master Lu рейтинглари, 2020 йил 1-чорак)

Oppo Ace 2 техник таъминоти асосини Snapdragon 865 процессори ташкил этади. Уни тезкор хотираси 8/12, ички хотираси эса 128/256 гигабайтлик вариантларда чиқаришяпти, лекин LPDDR5 чиплари фақат 12 гигабайтлигида қўлланмоқда.

OLED-дисплей диагоналига 6,55 дюймлик, тасвир аниқлиги 2400х1080 пикселлик бўлиб, 90 герцлик кадр янгиланиш частотасини қўллаб-қувватлайди. Экраннинг сенсор қатлами бўлса 180 герцлик частотада янгиланади; дактилоскоп ҳам дисплейнинг ўзига жойланган. Компаниянинг маълум қилишича, Ace 2 экрани DCI-P3 ранг ҳудудини 100 фоиз қамраб олади ва ёрқинлиги 500 кд/м2.гача боради.

Флагманнинг бош камераси тўртта датчикни ўз ичига олади; асосий сенсор – 48 пегапикселлик Sony IMX586 модули. Унга 8 МПлик кенг бурчакли датчик, 2 МПлик макрокамера ва 2 МПлик чуқурлик сенсори ҳамроҳлик қилган. Экраннинг тирқишига жойланган олд камера аниқлиги эса 18 мегапикселлик.

Oppo Ace 2 аккумулятори 4000 мА/соатлик, аниқроғи – унда ҳар бири 2000 мА/соатлик бўлган иккита батарея бирлашган. Айтиш керакки, зарядлаш қуввати 50 ваттдан юқори бўлган барча смартфонларда шунақа ечим қўлланади.

ЎҚИНГ: Дунёдаги энг қудратли смартфон энди Lite-версияда чиқяпти

Рекордчи флагманнинг корпуси ўлчамлари 160х75,4х8,6 миллиметрлик бўлиб, 186 грамм тош босади. Унда энг янги – Wi-Fi 6 интерфейси, контактсиз тўловлар учун NFC модули ҳамда замонавий USB-C порти, Dolby Atmos технологияли стереодинамиклар қўлланган. Қурилма Android 10 операцион тизим асосида тайёрланган ColorOS 7.1 график қобиғи бошқаруви остида ишлайди.

Компания бу флагманини Хитой бозорига 20 апрелдан, қора ва бинафшаранг корпусларда чиқаради. Нархлари эса тезкор/ички хотира ҳажмига қараб қуйидагича:

OPPO Ace 2 8/126 ГБ — $567

OPPO Ace 2 8/256 ГБ — $623

OPPO Ace 2 12/256 ГБ — $652

Дарвоқе, 40 ваттлик тезкор симсиз қувватлаш станцияси алоҳида, 35 доллардан сотилади.

ЎҚИНГ: Redmi Note 9 5G ҳам тайёр: атиги 140 долларлик 5G-смартфон тезкор қувватлана олади!