Oppo Reno8 ва Reno8 Pro моделлари халқаро бозор учун тақдим этилди

Oppo Reno8 ва Reno8 Pro моделлари халқаро бозор учун тақдим этилди

Oppo Reno8 сериясида иккита смартфон халқаро бозорга сотувга чиқади. Reno8 Pro модели май ойида Хитой бозори учун Reno Pro+ номи остида тақдим этилган бўлса, оддий модель Хитойда сотиладиган Reno8'нинг такомиллашган версияси ҳисобланади. 

Икки смартфон иккита катта фарқни ҳисобга олмаса бир-бирига жуда ўхшайди. 

Oppo Reno8 Pro 

Reno8 Pro модели Dimensity 8100 Max чипи билан жиҳозланган. Чип 5 нанометрли жараён асосида яратилган бўлиб, унда тўртта Cortex-A78, тўртта a55 ядролари ва Mali-G610 MC6 график процессори жойлашган. Тасвирни яратиш учун компанияга тегишли MariSilicon X чипи ёрдамга келади. 

Қурилмага 1,080 х 2,412 пиксел резолюциядаги 6.7 дюймли AMOLED дисплейи ўрнатилган бўлиб, у 120 гертс янгиланиш частотаси ва HDR10+ функцияларини қўллаб-қувватлайди. 

PUBG'ни ушбу смартфон орқали 90 гертсли режимда ўйнаш мумкин. Бу жиҳатдан Reno8 Pro модели Reno смартфонлар орасида биринчи бўлди. Иккала смартфон ҳам бир хил камера тўпламига эга, бироқ MariSilicon чип сабаб Pro модель яхшироқ суратларни тақдим этади.

Орқа панелдан 1/1.56 дюймли Sony IMX766 сенсорига эга бўлган 50МП асосий камера жойлашган. Унга f/1.7 диафрагмадаги 7P линзаси ўрнатилган. Асосий камерадан ташқари Sony IMX355 сенсорли 8МП ультракенг ва 2МП макро камераларни ҳам учратиш мумкин. 

Олд томонда IMX709 сесори билан жиҳозланган 32МП селфи камера жойлашган. Ёруғлик паст бўлган вақтда камера RGBW матрицадан фойдаланиб сурат сифатини яхшилайди. Селфи камера автофокус функциясига эга эканлигини таъкидлаб ўтиш зарур. IMX709 ҳам, IMX766 сенсори ҳам 4х кенг динамик диапазон учун DOL-HDR'ни қўллаб-қувватлайди.

Шунингдек, Pro модель стерео динамик ва X-axis ҳаптик двигателга эга. Орқа панель ичида графит қоплам жойлашган. Айтганча, орқа панелнинг ўзи шиша билан ҳимояланган. 

Oppo Reno8 Pro модели 19 июлдан сотувга чиқади. Унинг 8/256ГБ хотирага эга турининг нархи тахминан 575 долларни ташкил этади. Бундан ташқари, 12/256ГБ хотирали версия ҳам сотувга чиқади. 

Oppo Reno8 

Рено8 модели Dimensity 1300 чипида ишлайди. Ушбу чип ҳам тўртта A78 ҳамда A55 ядролари, шунингдек, эски авлоддаги Mali-G77 MC9 график процессорига эга. 

Чип 8ГБ LPDDR4X тезкор ҳамда 256ГБ UFS 3.1 доимий хотираси билан бириккан. Ҳиндистон бозори учун ишлаб чиқилган версия эса 128ГБ доимий хотирага эга бўлади. Икки смартфон Android 12 операцион тизимига асосланган ColorOS 12.1 график қобиғида ишлайди. 

Оддий моделнинг дисплей Pro моделникидан фарқ қилади. Унга FHD+ резолюциядаги 6.4 дюймли AMOLED дисплейи ўрнатилган. Дисплей 90 гертсда ишлайди ҳамда унда HDR10 функцияси мавжуд эмас. 

Юқорида таъкидлаганимиздек, иккала смартфонга бир хил камералар ўрнатилинган. Шунинг учун Reno8 моделида бунга тўхталиб ўтирмаймиз. 

Смартфонларнинг ҳажми икки хил бўлса ҳам, иккала моделга 4,500 мАс сиғимли аккумулятор ўрнатилган. У 80 ваттлик SuperVOOC қуввлаш технологиясини қўллаб-қувватлайди. Гаджетлар 50% қувват олиши учун 11 дақиқа вақт сарфлайди. Шуни таъкидлаш керакки, 110 ваттлик қувватли электр билан таъминланган давлатлар учун 66 ваттда қувват олувчи смартфонлар етказиб берилади. 

Oppo Reno8 модели 25 июль санасидан сотувга чиқади. Унинг нархи 488 долларни ташкил қилади.

ЎҚИНГ: Nothing phone (1) смартфонида биринчи ишкал 

Сайт янгиликларидан доимий хабардор бўлиш учун Телеграм каналимизга қўшилинг!