Ортга назар: Кутилмаган брендлардан ноодатий телефонлар (2-қисм)

Ортга назар: Кутилмаган брендлардан ноодатий телефонлар (2-қисм)

Ўтган ой, кутилмаган брендлар томонидан чиқарилган ноодатий телефонлар ҳақида маълумот берган эдик. Бироқ мақола ўз ниҳоясига етмаган эди. Қуйида электроника бизнесидан бошқа соҳага ихтисослашган компаниялар ишлаб чиқарган ғайриоддий телефонлар ҳақида суҳбатимизни давом эттирамиз.

Pepsi P1
Алкоголсиз ичимликлардан ташқари, Pepsi смартфон ҳам ишлаб чиқарганини биласизми? Компания иккита — Pepsi P1 ва P1S смартфонларини чиқарган.

...

Смартфонлардан мақсад фойда олиш эмас, балки компанияга бўлган эътиборни ошириш эди. Pepsi смартфонлари чекланган миқдорда – 1,000 дона чиқарилган. Смартфонлар нархи 110 доллар бўлишига қарамай, анчайин яхши аппарат таъминотга эга эди. P1 модели алюминий корпус, 5.5 дюймли 1080p экран, саккиз ядроли процессор, 13МП камера ва LTE алоқасига эга эди. Pepsi смартфонлари хитойлик компания томонидан ишлаб чиқарилган ва Android асосидаги didoOS операцион тизимида ишлаган. Қурилмаларга Pepsi темаси ўрнатилган, албатта.

...

Onkyo Granbeat DP-CMX1
Onkyo компанияси ўзининг аудио ва уй кинотеатри ускуналари билан танилган. Бироқ компания кўчма электроника мосламалари, масалан, кўчма аудио плейер ва Granbeat DP-CMX1 смартфонини, ҳам ишлаб чиқарган.

Granbeat DP-CMX1 смартфони кўп жиҳатдан ўтган галги мақоламиздаги Marshall London'га ўхшаш. Смартфонда иккита: 3.5 мм аудио жек ва 2.5 мм мувозанатлашган аудио жек бор.

Смартфон аналог товушни рақамли товушга айлантирувчи конвертор (DAC) ва иккита товуш кучайтиргич билан жиҳозланган. Қурилма жуда қўпол бўлиб, алюминий корпусга эга. Смартфоннинг, шунингдек, мусиқа тинглаш учун моддий тугмачалари ҳам бор.

...

Onkyo Granbeat DP-CMX1 смартфони 128ГБ хотирага эга эди. microSD слоти ҳам бор.

Ушбу гаджет зўр аудио плейер бўлиши мумкин, лекин уни яхши Андроид смартфон дейиш хато бўлади. Granbeat Smnapdragon 650 чипи билан жиҳозланган, Android 6.0 Marshmallow тизимида ишлаган, экрани 5" 1080p бўлган. 3,000 мАс сиғимли аккумулятор эса 25 соат мусиқа тинглаш имконини берган. 16МП асосий камера ва 4МП селфи камера билан ўртача сифатли видео ва расмлар олиш мумкин бўлган.

Kodak Ektra
Фотографиядан яхши хабардор бўлганлар учун «Kodak Ektra» номи 1940-йилларда чиқарилган 35 мм лик камерани эслатиши мумкин, бироқ биз айтаётган қурилма 2016 йилда чиқарилган камерага ихтисослашган Android смартфондир. Kodak'нинг илк Android смартфони IM5 унчалик ҳам муваффақиятли чиқмаган, бироқ компания смартфон оламида ўзини яна бир марта синаб кўришга қарор қилган.

...

Смартфоннинг энг муҳим жиҳати орқа панелдаги 1/2.3" сенсор, f/2.0 апертурали 21МП камераси бўлган. Камера 6 ўқли тасвирни барқарорлаштириш хусусияти ва 4K видео ёзиш имкониятига эга бўлган. Смартфоннинг ретро кўринишдаги соф теридан ишланган чехоли ҳам бор эди.

...

Kodak Ektra учун соф теридан ишланган чехоллар

Leica компаниясининг ҳозирги амалиёти сингари, Kodak ҳам фотография соҳасидаги муваффақиятларини смартфонга татбиқ қилган ва натижада ўта ажойиб ретро камера режимларини яратган. Масалан, Super8 видео иловаси 8 мм лик плёнкага олинган видео таассуротини қолдириш учун видеога винет дизайни ва ўзгартирилган ранглар берган. Tri-X деб аталган оқ-қора режим ҳам бўлган.

...

Kodak Ektra'да олинган расмлардан намуналар

Kodak Ektra 5 дюймли 1080п экран; Helio X20 чипи; 3ГБ тезкор, 32ГБ доимий хотира ва microSD карта уясига эга эди. Смартфон аввалига Буюк Британияда 450 фунтдан сотувга чиққан. Кейинчалик 500 евро нархда Европада, 400 доллар нархда эса АҚШда сотила бошлаган. Ўша йиллари Кодак компанияси Арчос бренди билан ҳамкорликда планшетлар ҳам чиқарган.

RED Hydrogen One
Камералар ишлаб чиқарувчи компаниянинг Android смартфон яратишдаги ҳаракатларининг нисбатан янги маҳсули RED Hyrdogen One қурилмасидир. RED камералари жуда ҳам оммабоп бўлиб, улардан ҳам кичик компаниялар, ҳам Голливуднинг йирик компаниялари фойдаланади. Бундай компания смартфон ишлаб чиқарса, бу смартфоннинг камераси аъло даражада бўлишини ҳамма кутади, бироқ ...

...

Hydrogen One смартфони 2018 йилда чиқарилган бўлса ҳам, у негадир 3D'га ихтисослашган эди. Смартфон иккита 12.3МП камера ва автостереоскопик 3D экран билан жиҳозланган. Бу экран биз ҳозиргача кўрган 3D экранлардан кўра илғорлоқ эди ва RED уни «4 View» деб атаган.

ЎҚИНГ: Xiaomi'нинг 9 та антиқа гаджетини биласизми?

Хабарларни тез ва осон ўқиш учун Андроид иловамизни сақлаб олинг.