Ортга назар: S сериясининг биринчи вакили бўлган Galaxy S смартфони
Samsung Galaxy S (I9000 модель рақамли) 2010 йилнинг март ойида тақдим этилган. Демак, S серияси пайдо бўлганига 10 йилдан ошди. Galaxy S июнь ойидан бошлаб сотила бошлаган ва 2011 йилгача жами 10 миллион дона сотилган. Шулардан 4,000,000 та Шимолий Америкада, 2,500,000 та Европада сотилган.
S сериядаги смартфонлар Super AMOLED дисплейини оммлаштирди. Бироқ Galaxy S бу турдаги дисплей билан жиҳозланган биринчи смартфон эмас. Samsung биринчи бўлиб AMOLED дисплейларини Bada операцион тизими билан ишловчи Wave сериясидаги смартфонларга ўрнатган. Компания Wave смартфонлари миллионлаб миқдорда сотилишини кўзлаган эди. Лекин Android смартфонлари тезлик билан оммалашгани сабаб Bada, Symbian, Windows каби операцион тизмида ишловчи гаджетлар урфдан қолган.
Galaxy S — 4 дюймли 480 х 800 пикселлик экранга эга бўлган. Дисплей Gorilla Glass шишаси билан ҳимояланган. Гаджетда экрандаги тасвирлар ёрқин намоён бўлади. Чунки бу вақтда кўплаб телефонларнинг экрани ва экранни ҳимоя қилувчи шиша ёки пластик орасида бўшлиқ бўлар эди.
9.9 мм қалинликда бўлган гаджет дунёнинг энг ингичка Android смартфони бўлган.
Қурилмага кейинчалик Exynos 3 Single 3110 номига ўзгарган Hummingbird S5PC110 чипи ўрнатилган. Бу биринчи Exynos чипи бўлиб, юқори унумдорликдаги CPU ишлаб чиқаришга иқтисослашган Intrinsity компанияси билан ҳамкорликда ишлаб чиқарилган. 
Чипда 1.0GHz (баъзи вариантларда 1,4GHz) ишлайдиган бир ядроли Cortex-A8 процессори мавжуд эди. Процессор 512MB тезкор хотира ва 8GB доимий хотира (16GB хотира тури ҳам бор) билан ишлаган. Шунингдек, Galaxy S 32GB'гача бўлган microSD карталарни қўллаб-қувватлаган.
Шубҳасиз, Galaxy S ўз даврининг энг яхши мультимедиа смартфонларидан бири бўлган. Девайс Div HD серификатига эга бўлган биринчи Android смартфон бўлган. Албатта, AMOLED экрани юқори контрастли ва тўйинган ранглар билан ажойиб таассуротларни берган.
Телефонга, шунингдек, Wolfson WM8994 DAC билан жиҳозланган 3,5 мм лик аудио жек ўрнатилган. Овоз сифати тестида қурилма яхши натижаларни қайд этган.
Galaxy S Android 2.1 Eclair операцион тизимида ишлаган ва TouchWiz 3.0 қобиғи билан таъминланган.
Samsung TouchWiz лойиҳасини бир неча йил олдин Windows Mobile, Symbian ва бошқа операцион тизимларида ишлайдиган телефонларининг сенсорли интерфейсларини бирлаштириш мақсадида бошлаган эди.
Смартфон 2.3 Gingerbread'гача бўлган дастурий таъминот янгиланишини қабул қилган. Оператив хотирада етарли жой мавжуд бўлмаганлиги сабаб, Galaxy S Android 4.0 ва бошқа янги прошивкаларни қабул қила олмаган.
Смартфон 5MP камера билан жиҳозланган. LED чироғи бўлмаган. Гаджетда олинган суратларни жуда ҳам сифатли деб бўлмайди. Суратлар бироз хира ва қоронғи кўринади. Яхши томонлари ҳақида гапирсак, девайс 720 пиксел 30 кадр/секундда видеога олиш имкониятига эга эди. Таққослаш учун, Samsung I8910 Omnia фақатгина HD 24 кадр/секундда видеога оларди.
Galaxy S смартфонини бир неча талқиндаги версиялари бўлган. Улардан бири I9003 Galaxy SL смартфони эди. Бу смартфонни ишлаб чиқаришга сабаб Galaxy S бироз арзонроқ турини сотиш эди. Смартфонни техник жиҳатлари ҳам ўз нархига яраша эди. Мисол учун, Super AMOLED ўрнига SC-LCD дисплейи, қуйироқ тоифадаги TI OMAP 3630 чипи ўрнатилган. Шунингдек, қурилманинг тезкор ва доимий хотираси ҳам қисқарган.
Galaxy S'нинг такомиллашган версияси деб I9001 Galaxy S Plus'ни айтиш мумкин. Гаджетга Super AMOLED дисплейи ва такомиллашган 1,4GHz Scorpion ядрога эга бўлган Snapdragon чипи ҳамда Adreno 205 график процессори ўрнатилган. Қурилма тестдан ўтганда унинг CPU'си яхши натижа қайд эган бўлса, GPU унчалик яхши натижа қайд эта олмаган.
