Орзиқиб кутилаётган OnePlus 6'нинг расмий номи маълум бўлди
Хитойнинг OnePlus компанияси сўнгги бир неча ойдан бери эълон қилиниши орзиқиб кутилаётган ўзининг навбатдаги смартфонини тарғиб қилиш бўйича маркетинг компаниясини бошлаб юборди. Компаниянинг Twitter'даги расмий саҳифасида эълон қилинган атиги тўрт сонияли тарғибот видеосида янги қурилманинг расмий номини кўриш мумкин ва у, ҳамма тахмин қилганидек, OnePlus 6'дир.
6et ready! pic.twitter.com/bmvI75xphm
— OnePlus (@oneplus) April 2, 2018
Компания янги қурилма “сиз кутган тезлик“ни беришига ишонтирмоқда. OnePlus раҳбари Пит Лау эълон қилиниши кутилаётган қурилма Qualcomm'нинг Snapdragon 845 процессори билан таъминланиши сабабли унинг ишлаш тезлиги анча юқори бўлажагини маълум қилган эди. Жаноб Лау, шунингдек, OnePlus 6'нинг июнь ойида сотувга чиқарилишини ҳам айтган эди. Бироқ кузатувчилар бошланиб кетган маркетинг кампанияси смартфоннинг ундан олдинроқ эълон қилинишидан даракдир, деб тахмин қилмоқда.
Бундан ташқари, OnePlus компанияси асосчиларидан бири Карл Пей OnePlus 6 «ўйиқ» экранга эга дизайнда ишлаб чиқарилишини айтган эди. Қурилма экранининг “кемтик“ка эга бўлиши компаниянинг аксарият мухлислари ғазабига сабаб бўлган. Ҳозирда мавжуд маълумотларга кўра, бу «кемтик» 19.62 х 7.69 мм ўлчамда бўлади, яъни унинг ўлчами Essential Phone'никидан катта, лекин iPhone Х'никидан кичикроқ.
Ҳозирга қадар ушбу қурилма хусусиятлари тўғрисида маълум бўлган маълумотлар қуйидагича:
- 6 дюмга тенг 2880х1440 QHD + 18:9 ўлчамли экран ва «кемтик»
- Симсиз қувватланишга имкон яратувчи шиша дизайн
- Qualcomm Snapdragon 845 СоC процессори
- 6ГБ RAM, 64, 128, 256ГБ ички хотира (microSD қўйиш имконияти билан)
- Android 8.1 Oreo операцион тизими
- Қўшкўз орқа камера
- Орқа томонга ўрнатилган тўртбурчак шаклдаги бармоқ изи сканнери, Face Unlock (юзни таниш функцияси)
Қурилманинг 256Гб ички хотирага эга талқини $749 атрофида сотилиши тахмин қилинмоқда.
