Ўзбекистонда Oppo Reno8 Т смартфони сотувлари бошланди
Oppo компанияси ўтган феврал ойи бошида ўзининг Reno8 Т смартфонини ортиқча дабдабаларсиз глобал бозорга тақдим қилди. Маълум бўлишича, компаниянинг янги ўрта синф смартфонлари сотуви Ўзбекистонда ҳам бошланган.
Oppo Reno8 Т аслида икки хил: MediaTek'нинг 6 нанометрли Helio G99 чипсетида ишлайдиган 4G, ҳамда, Qualcomm'нинг Snapdragon 695 чипсетида ишлайдиган 5G вариантларида чиқарилган, лекин сиз Ўзбекистонда фақат унинг 4G моделини топасиз (5G бўлмагандан кейин 5G вариантини нима ҳам қилардингиз?).
Шундай қилиб, бизнинг Oppo Reno8 Т смартфонларимиз MediaTek чипсетида фақат 8 GB (+8 GB виртуал) RAM ва 128 GB хотира билан Android 13 га асосланган ColorOS 13 операцион тизимида ишлайди. Унинг батареяси 5000 мА/соат бўлиб, уни SuperVOOC технологиясига асосланган 33 Вт тезликда USB-C порти орқали зарядлаш мумкин. Компаниянинг таъкидлашича бундай тезликда смартфон 67 дақиқада 100% қувватланади.
Смартфоннинг Gorilla Glass 5 билан ҳимояланган 6.43 дюймли дисплейи 90 герц янгиланиш тезлигига ва FHD+ (2400×1080) пиксел резолюциясига эга. Экраннинг чап юқори бурчагидаги юмалоқ камера тирқишида 32 мегапикселли селфи камера жойлашган.
Орқа томондаги иккита катта юмалоқ камера оролларида яна учта тасвирга олиш сенсорлари бор. Уларнинг асосийси 100 MP (f/1.7) ва у алоҳида юмалоқ камера оролидан ўрин олган. Қолганларининг иккаласи ҳам 2 MP бўлиб, уларнинг бири портрет, яна бири эса 40 карра яқинлаштиришга эга макро камералардир. Улар LED чироғи билан иккинчи камера оролидан жой олишган.
Oppo Reno8 Т'нинг бошқа смартфонларидан ажратиб турадиган хусусияти бу унинг орқа асосий камера оролида жойлашган Orbit Light номли ҳалқа чироғи бўлиб, у сизни билдиришномалар келганда, смартфон қувват олаётганида ва бошқа ҳолатларда огоҳлантиради. Энди эса сиз уни ўзингиз учун ҳам мослаштириб олишингиз ҳам мумкин.
Қўшимчасига смартфонда 3.5 миллиметрли наушник уяси, иккилик нано SIM-карта уяси, иккилик стерео динамиклар, Bluetooth 5.3, NFC, бармоқ изи ва юзни аниқлаш сканерлари ҳам бор.
Oppo Reno8 Т икки хил: Sunset Orange ва Midnight Black рангларида таклиф қилинади. Бунда апелсин рангли модел чарм билан қопланган. Бу билан унинг қалинлиги 7.85 миллиметрни, оғирлиги эса 183 граммни ташкил қилади. Қора ранг вариантдаги Reno8 Т эса пластик билан қопланганлиги билан бирозгина енгил ва ингичкароқ: 7.80 мм/180 грамм.
Oppo Reno8 Т смартфони 8/128 GB хотира конфигурациясида ҳозирда mediapark.uz сайтидан 3 999 000 сўм нархда сотиб олишингиз мумкин.
