Palm смартфони тақдим этилди: ўзи миттигина, лекин бақувват, яна нархиям...

  •   DiMaX
  •  1694
  •  16.10.2018 10:01

Palm смартфони тақдим этилди: ўзи миттигина, лекин бақувват, яна нархиям...

TCL компанияси Palm брендини бундан уч йил аввал сотиб олган, лекин музлатиб қўйган эди. Яқинда модель рақами PVG100 бўлган янги қурилма сертификатланганлиги ҳақида хабар бергандик.

ЎҚИНГ: Android 8.1 Oreo’да ишлайдиган Palm PVG100 сертификация синовидан ўтди

Ниҳоят, мазкур бренд остида янги – Palm деб номланган смартфон тақдим этилди. Компания ушбу ихчамгина қурилмани асосан «лопатафон»лардан зерикканларга мўлжалламоқда. «Миттифон» корпуси ҳар икки томонидан Gorilla Glass ҳимоя шишаси билан муҳофаза этилган.

Palm диагоналига 3.3 дюймлик IPS-дисплей билан таъминланган, унинг пикселлар зичлиги 445ppi’га тенг. Экран тепасига селфилар учун 8 мегапикселли камера қўндирилган. Асосий камераси эса 12 мегапикселли датчикка эга.

Смартфоннинг самарадорлиги учун Qualcomm Snapdragon 435 процессори ҳамда 3 гигабайтлик тезкор хотира масъул. Ички хотираси ҳам чаккимас – 32 гигабайт. Уни қувват билан 800 мА/соатлик аккумулятор таъминлаб туради.

ЎҚИНГ: Дунёдаги энг митти телефон тақдим этилди (+видео)

Android 8.1 Oreo операцион тизим талқини бошқаруви остида ишловчи Palm смартфонида мақтанишга арзирли жиҳатлар кўп. Жумладан, унинг корпуси IP67стандартига кўра сув ва чангдан ҳимояланган.

Қурилма замонавий USB-C портига, Google овозли ёрдамчисини ишга тушириш учун алоҳида тугмачага эга. Олд камера орқали юзни таниш йўли билан тизимни қулфдан чиқариш – Face Unlock функциясини ҳам таъкидлаб ўтса арзийди.

Palm «миттифон»и шу йилнинг ноябридан икки хил (Titanium ва Gold) рангли корпусда, фақат АҚШнинг Verizon оператори томонидан сотилади. Ўзи кичкина бўлса-да, нархи унчалик ҳам кичик эмас – 349 доллар. Тағин, уни бирор асосий смартфонга қўшимча қурилма (ёки аксессуар) тарзида қўшиб сотишади.

ЎҚИНГ: Ихчам смартфонлар: «Кичкина деманг бизни…»

Сайт янгиликларидан доимий хабардор бўлиш учун Телеграм каналимизга қўшилинг!