Payme назорат пакетини 5,5 миллион долларга Грузиянинг TBC Bank’и харид қилди
Грузиянинг TBC Bank Group PLC компанияси (TBC Bank) юртимизда Payme бренди остида фаолият юритаётган «Inspired» МЧЖнинг 51 фоиз назорат пакетини харид қилади. Бу тўғрида компания хабарига таяниб «Спот» нашри ёзмоқда.
ЎҚИНГ: Энди давлат хизматлари учун тўловларни Payme орқали амалга оширса бўлади
Хабарга кўра, Payme Ўзбекистондаги тўлов хизматларининг етакчи тақдим этувчиси бўлиб, унинг иловаси мижозлари 1,3 миллион кишини ташкил этади.
Кейинги йилларда Payme тез ўсди – 2018 йил мобайнида мижозлар сони тахминан 70 фоизга ошди. Натижада компания даромади ва соф фойдаси тегишлича 41,9 ва 24,5 фоизга ўсган. Ўтган йилнинг якунига келиб Payme’нинг умумий активлари 0,7 миллион АҚШ долларига етган.
Payme брендига 2011 йили асос солинган ва учта муассис томонидан бошқарилиб келмоқда. Жамоа иккита янги акционер билан кучайтирилган: улардан бири бизнесни кучайтириш ва тадқиқотлар бўйича ижрочи директор, иккинчиси эса – бош техник директор вазифасини бажарган.
TBC Bank’ка ўз акцияларининг бир қисмини сотган акционерлар эса компания менежерларидан бўлган беш кишидир. «Менежерлар жамоаси узоқ муддатли асосда Payme билан қолишади ҳамда стратегиянинг ишлаб чиқилиши ва амалга оширилишида фаол иштирок этишади», – дейилади хабарда.
TBC Bank’дан хабар беришларича, мазкур харид ҳудудий операцияларни кенгайтириш бўйича халқаро стратегияга мувофиқ келиб, банк потенциалини ўта истиқболли бўлган Ўзбекистон бозорида кучайтириш учун муҳим асос бўлиб хизмат қилади.
Грузия банкининг Ўзбекистондаги стратегияси чакана мижозлар ҳамда кичик ва ўрта бизнес вакиллари учун янги авлод банк экотизимини яратишга қаратилган. Бунда асосий эътибор рақамли каналларга, жумладан, буткул рақамли Space банкига қаратилади.
ЎҚИНГ: «BankExpo-2019»: илғор IT-ечимлар, рақамли банкинг ва халқаро ҳамкорлик
Дарвоқе, акцияларнинг 51 фоизи 5,5 миллион АҚШ долларига харид қилинганига кўра, Payme компанияси жами 10,8 миллион долларга баҳоланган. TBC Bank ушбу харид тўловини апрелнинг охиригача тўлайди. Шунингдек, банк келгусида Payme акцияларининг қолган 49 фоизини ҳам сотиб олиши мумкинлиги ҳақида битим тузилган.
«Payme хариди – бизнинг Ўзбекистонда режалаштираётган экспансиямизда яна бир муҳим қадамдир. У бизга мамлакатдаги катта мижозлар базаси билан тезкор боғлана олиш ҳамда ўзимизнинг асосий рақамли имкониятларимиздан фойдаланиш имконини беради. Payme билан биргаликда биз бундан кейин ҳам тўлов бизнесини тараққий эттириш, шунингдек янги экотизимларни ривожлантиришда уни платформа тарзида қўллаш ниятидамиз», дейди TBC Bank бош директори Вахтанг Буцхрикидзе.
«Аминманки, биргаликда биз компанияни янги босқичга кўтарамиз ҳамда жуда қисқа муддатларда ўз мижозларимизга янги илғор ечимлар ва хизматлар таклиф этамиз», – дейди Payme бошқарувчиси Сарвар Рўзматов.
TBC Bank ўз мамлакатида етакчи банк бўлиб, 1992 йили ташкил этилган. 2014 йили у лондон фонд биржасига киришга эришган. Унинг онлайн банкинг тизими Марказий ва Шарқий Европада энг яхшиларидан бири сифатида кетма-кет бир неча йил мобайнида совринлар олган. 2018 йили эса у бутунлай рақамли бўлган Space банкини тақдим этган.
Мазкур компаниянинг Ўзбекистон бозорига киришга ҳаракат қилаётгани жорий йилнинг январь ойи бошида маълум бўлганди. Ўшанда TBC Bank бу бозорга ўзининг буткул рақамли Space банкини олиб кирмоқчи эканини айтган.
