«Пентакамерали» Nokia 9 флагманини илк бор олдиндан кўрсатишди!
Хабарингиз бор – HMD Global компаниясининг энг кутилаётган Nokia 9 флагманига нақ бешта объективли камера ўрнатилади. Бу ишланма учун махсус «пента-камера» («бешталик камера»), шунингдек, «револьвер камера» атамаларини қўллашяпти.
ЎҚИНГ: Беш модулли инқилобий камерага эга Nokia смартфони илк «жонли» суратда!
Инсайдерлар шу пайтгача Nokia 9 моделининг бир неча «жонли» расмларини чиқариб юборишган, аммо бирор марта бу флагманнинг олд юзасини кўрсатишмаган эди. Ниҳоят, бугун – 2018 йилнинг 28 сентябрида Weibo ижтимоий тармоғига унинг олд томони акс эттирилган нақ иккита сурат чиқарилди.
Экранининг чеккалари думалоқланган ушбу смартфон жорий йилнинг бошида намойиш этилган Nokia 8 Sirocco моделига жудаям ўхшаш.
ЎҚИНГ: Nokia 8 Sirocco флагмани тақдим қилинди
Таъкидлаш керакки, булар – Nokia 9’нинг «жонли» суратлари эмас, балки фабрика чизмалари асосида машинада сифатли қилиб ишланган тасвирлардир. Уларни Quansong Technology компанияси тақдим этган.
Агарда Nokia 9 чиндан ҳам шу кўринишда бўлса, демак, HMD Global ҳам навбатдаги флагманида 3,5 миллиметрлик қулоқчин тирқишидан воз кечяпти экан.
Nokia 9 смартфонининг анонси бу йилнинг сўнгида бўлиб ўтиши ҳақидаги тахминлар рад этилган. Афтидан, уни келаси йилнинг февралида, Mobile World Congress 2019 кўргазмасида тақдим қилинади.
