Пепсифон

Пепсифон

Pepsi деганда, аввало, салқинлаштирувчи газли ичимлик кўз олдимизга келади. Келажакда эса кўз ўнгимизга келувчи яхна ичимлик ўрнини смартфон эгалласа, ажаб эмас. Компания тез кунларда смартфон ишлаб чиқаришни бошлаши мумкин.

Twitter ўхшаши бўлмиш Хитойнинг Weibo ижтимоий тармоғида Pepsi Phone номли аккаунт пайдо бўлди. Аккаунт тасвирида ичимлик эмас, телефонга хос пиктограмма бор, ИТ / электроника / мобиль телефон ишлаб чиқарувчилари манзилида турибди. Ёзишмаларида эса тез кунларда кутилмаган совға маълум бўлиши ҳақида сирли ваъда берган.

“Кимнингдир ҳазилини ҳам янгилик деб эълон қиласизми?” – дея смайлик билан истеҳзоли изоҳ қолдиришга шошилманг. Гап шундаки, Pepsi компанияси телефон билан боғлиқ қандайдир янгилик устида ишлаётгани аломатлари сезилмоқда. Агар янги телефон ишлаб чиқарадиган бўлса, бу фақат Хитой аҳолисига сотилиши ва компания бизнеси учун ўзига хос реклама вазифасини ўташи эҳтимоли юқори. Эслатиб ўтиш жоизки, Pepsi тарихида бренд аппарат билан алоқадор тажриба бўлган. Орро компанияси ҳамкорликда Oppo N1 Pepsi edition смартфонини тайёрлаган, смартфон кўриниши эса Pepsi логотипи ранглари уйғунлигида ишланган эди.

Terabayt.uz сайтининг видеолари: Youtube'даги каналимизда!