«Perfectum» арзонлаштирилиб, яна савдога қўйилди – унинг тақдири нима бўлади?
Ўтган ойда «Perfectum» бренди остида уяли алоқа хизматларини кўрсатувчи «Rubicon Wireless Communication» МЧЖ кўчмас мулки сотувга қўйилгани ҳақида хабар берган эдик. Ушбу мулк нархи пасайтирилиб, қайта аукционга қўйилди, деб ёзади Ўзбекистон Миллий ахборот агентлиги.
ЎҚИНГ: Кутилмаганда «Perfectum» савдога қўйилди!
Электрон онлайн аукционларни ташкил этиш маркази ДУК сайтида «Rubicon Wireless Communication» МЧЖ кўчмас мулки қайта сотувга қўйилди. Очиқ аукцион «нархни тушириб бориш» йўли билан, демпинг усулида ўтказилади. Мулкнинг бошланғич нархи 205 миллиард 587 миллион сўм этиб белгиланган. Ушбу мулк сотилиши мумкин бўлган энг паст нарх 164 милиард 469 миллион 613 минг сўм. Аукцион шу йилнинг 27 июнь куни бўлиб ўтиши кутилмоқда. Аризалар қабул қилиш аукцион белгиланган кундан икки кун олдин тўхтатилади.
Тошкент шаҳрида жойлашган «Rubicon Wireless Communication» МЧЖ (Perfectum) мамлакатда уяли алоқага хизмат кўрсатадиган йирик тадбиркорлик субъектларидан бири бўлиб, бунга қадар нархни ошириб бориш йўли билан сотиш учун савдога чиқарилган эди.
ЎҚИНГ: Аукционда биринчи «чиройли» мобил рақам 5,3 млн сўмга сотилди
Эслатиб ўтамиз, «Perfectum» уяли алоқа хизматини CDMA стандартларида кўрсатади ва бундай хизматлар кўрсатадиган операторлардан энг йириги ҳисобланиб, ҳозирга қадар Республикамизнинг барча вилоятларида сифатли хизмат кўрсатиб келмоқда. 2014 йилнинг охирларига келиб, «Perfectum Mobile» савдо белгисининг ребрендинги ўтказилган. Янги бренд «Perfectum»нинг асоси бу сифатли, ишончли ҳаммабоп уяли алоқа бўлиб, «Бугун! Абадий!» («Сегодня! Навсегда!» – «Today! Forever!») шиори остида инсонларни бир-бирига бирлаштирди. Ҳозирда компаниянинг юз минглаб абонeнтлари мавжуд.
Хўш, эртага аукциондан кейин компаниянинг фаолияти қай тариқа давом этади?
Сотувга чиқарилган «Rubicon Wireless Communication» МЧЖ устав фондидаги 65% улушини дебитор-кредиторлари, активлари ва 7106 хил турдаги, яъни барча мол-мулклари (бино-иншоотлари, автотранспорт воситалари, ускуналари ва бошқалар)нинг тегишли қисмини ташкил қилиши назар тутиладиган бўлса, электрон-онлайн аукцион ғолиби ушбу компаниянинг энг йирик муассисига айланади. Ва умид қиламизки, мазкур алоқа компаниясининг янада гуллаб-яшнашига ҳисса қўшади. Чунки мазкур лотнинг савдога қўйган буюртмачининг компания фаолиятини давом эттиришига ҳеч қандай эътирози йўқ.
