Phone 1 Lite ёки Phone 2?
OnePlus компаниясининг собиқ асосчиларидан бири, Карл Пей томонидан юритилаётган Nothing стартапи ўтган ойда ўзининг илк смартфонини катта шов-шувлар билан тақдим қилди. Оддий телефонлардан фарқли ўлароқ, phone (1) смартфони ўзининг орқа шаффоф дизайни ва Glyph интерфейси деб аталадиган 900 дан ортиқ LED чироқлари билан бошқалардан ажралиб туради. Бироқ, сўнгги хабарларга кўра лондонлик компаниянинг навбатдаги смартфони бу хусусиятларга эга бўлмайди.
The Mobile Indian нашрининг хабар беришича, Nothing аллақачон ўзининг иккинчи смартфони устида ишлашни бошлаб юборган ва у ҳозирги phone (1) нинг "lite", яъни "енгил" версияси бўлиши айтилмоқда. Янги қурилманинг ҳозиргисидан асосий фарқлари шундаки, у phone (1) да бўлгани каби на 900 LED чироқлари билан Glyph интерфейсига ва на симсиз зарядланиш хусусиятига эга бўлади. Фақат йўқотишлар эмас, Phone 1 Lite батареяси 5,000 mAh бўлиши мумкин. Бу эса ҳозирги 4,500 mAh батареяли phone (1) устидан яхши янгиланиш. Қолган техник хусусиятлар эса ўзгаришсиз қолади.
Маълум бўлишича, янги Nothing смартфони нархи ҳозиргисидан кўра арзонроқ, яъни бюджет вариантда бўлади. Миш-мишларга кўра, бўлажак телефоннинг 6/128 GB хотирали модели 315 доллар атрофида бўлиши мумкин.
Айтиш керакки, Nothing'га ушбу смартфон тўғрисида алоқага чиқилганида, компания маълумотларни рад этган ва янги телефон учун ҳозирча режалар йўқлиги айтилган.
