Пластик карточкаларни магнит хавфидан ҳимоялашни ўрганиб олинг!
Бугунги кунда оммалашган банк пластик карталарида, чипдан ташқари магнит лентачаси ҳам мавжуд. Ушбу тасмача карточканинг орқа (чип кўринмаётган) томонида кўзга ташланади.
ЎҚИНГ: Жиддий жиноят: Пластик картангиздаги пулни банкдагилар ҳам ўғирлаши мумкин!
Умуман олганда, нафақат банк картасида, балки шунга ўхшаш бошқа карталар – отелларда хонанинг калити сифатида қўлланувчи карталар, пропуск-карталарда ҳам магнит лентачаси мавжуд. Улар қора, жигарранг ёки кул ранг бўлиши мумкин. Агарда темир қипиқларини шу жойига сепиб кўрсангиз, зарралар маълум бир тартибда жойлашади. Бунинг сабаби эса ўша тасмача юзасидаги магнит майдонининг таъсиридир.
Модомики бу каби карталардаги магнитланган тасмача бор экан, унга магнит бирор салбий таъсир кўрсатиши мумкинми? Бу борада Украинанинг «Магнитон» дўконлар тармоғи махсус тажрибалар ўтказиб кўрган ва натижаларини ўз сайти орқали эълон қилган.
ЎҚИНГ: Мобил банк орқали пулингизни ўғирлашлари мумкин, бундан ҳимояланиш йўллари бор!
Карталарга ёзилган маълумотларга чиндан ҳам уларга яқинлаштирилган магнит таъсирида бузилиб, ўчиб кетар экан. Бироқ бу таъсирнинг қанчалик кучли бўлиши магнитнинг тури ва катталигига, шунингдек, карта тури ва ундаги магнит тасмачасининг қанчалик кучли магнитланганлигига боғлиқ.
Одатда, меҳмонхона номерларининг калити сифатида қўлланувчи ҳамда пропуск-карточкалар энг кучсиз магнитланган бўлади ва салгина магнитга яқинлаштирилса, маълумотлари ўчиб кетади. Банк карталарида эса тасмачанинг магнитланиш даражаси юқори бўлганлиги сабабли, заифроқ магнит таъсирига улар дош бера олади. Бироқ магнит майдони кучли, ҳажми йирик бўлган магнитлар уларни ҳам ишдан чиқаришга қодир.
Шу боисдан ҳам магнит тасмасига эга карталарингизни имкон қадар магнит яқинлашувидан асраганингиз маъқул. Акс ҳолда, у ерга ёзилган (карта эгасининг исм-шарифи, ҳисоб рақами, амал қилиш муддати ҳақидаги ва ҳоказо) маълумотлар ўчиб кетиши мумкин. Бунинг олдини олиш учун магнитли жисм ва банк карточкангиз орасида камида 2–3 сантиметр (бошқа турдаги карталарда эса – 10-15 сантиметр) масофа сақлашингиз кифоя.
ЎҚИНГ: Пластик карточка йўқолса нима қилиш кераклигини биласизми?
