Қандай қилиб Wi-Fi сигналини яхшилаш мумкин

Ҳозирги кунда интернет фойдаланувчилар сони анча кўпайди, чунки интернетдан ҳамма жойда фойдаланиш имконияти яратилди: уйда, ишхонада, кўчада, кафеда, ҳаттоки тоғли ҳудуларда ҳам. Бу эса технологияларни борган сари ривожланаётганини билдиради.

Олдин эсимда, dial-up орқали интернетга уланиб ишлар эдим, қанча асаблар бузилар эди, сайтларни очилишини кутишга кетган умумий вақтни ҳисобласам, ой бўлмаса ҳам, 2-3 ҳафта чиқса керак :). Асосийси алоқа узилишлари эди, энг қизиқ пайтда(айниқса онлайн ўйинлар ўйнаганда) ўша асабга тегадиган ойна чиқар эди(60 секундлик вақти билан), қайтадан уланишни амалга оширишни сўраб.

Ҳозир эса юқоридаги ҳолатга ўхшаш асаббузарликлар йўқ(камайган), чунки янги технологиялар ишлаб чиқилди(ADSL, FTTB), ҳаттоки симсиз алоқа(Wi-Fi) ўрнатиш ҳам мумкин бўлди. Бу технологиялар орқали бемалол интернетга уланиб, ҳаттоки олдин орзу қилинган, интернет орқали видео кўриш имкони пайдо бўлди.

Интернет билан симсиз алоқа ўрнатиш — Wi-Fi, кўп хонадонларга кириб келди, улардан актив равишда фойдаланишмоқда. Кўпчилик Wi-Fi орқали интернетга уланиб ишлаш, тезликнинг пасайишига олиб келади деган, хато фикрни илгари суришади, бундай фикр юритишлигига сабаб Wi-Fi роутердан тўғри фойдаланишни билмасликдир.

Wi-Fi технологиясида сигнал қуввати деган тушунча бор, бу қувват қанча кам бўлса, интернет тезлиги шунча паст бўлади. Сигнал қувватини кўпайтириш ва яхшилаш учун қуйида бериладиган маслаҳатларга амал қилишингиз лозим. Бу маслаҳатлар синовдан ўтган ва фойда беради деган умиддаман.

1. Wi-Fi роутернининг жойлашуви. Агар сиз интернетни фақат битта ҳонада ишлатмоқчи бўлсангиз, роутерни ўша хонага жойлаштиринг, агар сиз бутун ҳонадонда(квартирада) ишлатмоқчи бўлсангиз, иложи борича ҳонадон ўртасига жойлаштиринг.

2. Wi-Fi роутерни прошивка қилиш. Қурилма дастурини янгилаб туринг(прошивка). Бу ҳам сигнал қувватини ошишига олиб келиши мумкин, роутерда содир бўладиган муаммолар, янги прошивкада ўз ечимини топган бўлади.

3. Хавфсизлик ва созлаш. Интернет алоқангизни ҳимоялаш учун, унга уланиш паролини қийинроқ қўйинг, иложи бўлса шифрланг(WPA2), чунки ёнингиздаги ҳонадонда ҳам(қўшниларингиз) сизнинг интернетга уланишингиздан фойдаланишлари мумкин. Бу орқали сигнал қуввати бўлинади ва интернетга кириш секинлашади.

4. Тўсиқлар. Wi-Fi роутер турган жойдан, сиз интернетга кирмоқчи бўлган жойгача, иложи борича тўсиқ бўлмаслигини таъминланг, асосан бетонлар сигнал қувватини камайтиради. Бу бир ҳисобда, роутер жойлашишини танлашга боғлиқ.

5. Адаптер. Сигнал қувватини ошириш учун, қабул қилувчи қурилмадан фойдаланинг. Қабул қилувчи қурилма ноутбукларда мавжуд бўлади, лекин бироз кучсизроқ. Сиз ташқи қабул қилувчи қурилма сотиб олинг ва компьютерингизга уланг.

6. Репитер. Агар Wi-Fi роутердан сиз интернетга кирмоқчи бўлган жойгача масофа узоқ бўлса, репитердан фойдаланинг. Бу қурилма, сигнални қабул қилиб, қайта узатиш ҳусусиятига эга. Бу орқали уланиш масофасини узaйтириш мумкин.

7. Антена. Wi-Fi роутерларда узатувчи антена бўлади, кўпларида бу антенани алмаштириш имкони мавжуд. Сигнал қуввати етмаса, антенaни кучлироғини олиб, роутернинг ўз антенаси билан алмаштиринг. Бу сигнал қувватини кучайтиришнинг энг асосий усули.

8. Фирма. Wi-Fi роутер чиқарилган фирмага ҳам эътибор беринг. Қандайдир хитой ёзувли, арзон роутерларни сотиб олманг. Ҳозирда энг машҳур фирмалар: TP-LINK, ASUS, D-link, ZyXEL. Иложи бўлса. шу фирма маҳсулотларидан сотиб олинг.

Енг асосийси, интернет провайдерни яхшисига уланинг. Бу интернет тезликни бир маромда ишлашини таъминловчи энг асосий омил. Wi-Fi роутер фақат унгача келган сигнални тарқатиб беради холос.

Манба: ITportal.uz