Қарши олинг: Firefox Rocket – «реактив» Android-браузер!
Кейинги пайтларда нисбатан кучсиз смартфонлар ҳамда интернет яхши бўлмаган ҳудудлардаги фойдаланувчилар учун иловаларнинг «енгил» талқинларини ишлаб чиқиш урфга кираётир. Mozilla компанияси тақдим этган Firefox Rocket мобил браузери ҳам тизим ресурсларини кам сарфлаши ҳамда тезкор ишлаши билан ажралиб туради.
ЎҚИНГ: Keepsafe Browser – анонимликни таъминловчи янги бепул мобил браузер
Firefox Rocket, биринчи навбатда, смартфонининг хотирасида жой кам бўлган фойдаланувчиларга жуда маъқул келади. Браузернинг ўрнатилувчи файли атиги 2,5 мегабайтга тенг ва у хотирада жуда оз жой олади.
Унинг иккинчи афзаллиги – тезкорлигидир: компания браузернинг кодини жуда яхши ишлаб чиққан. Бунинг натижасида Firefox Rocket, ўз номига яраша (Rocket – «ракета» дегани) тезкорликка эга бўлган. Бу борада у оддий Firefox, кенг оммалашган Chrome ва ҳатто Opera’дан ҳам илгарилаб кетган.
«Ракета» браузернинг кўпчиликка маъқул келувчи учинчи жиҳати – сайтлардаги рекламалар ҳамда ҳисоблагичларни блоклашидир. Firefox Rocket тезкорлигида ҳам бунинг ҳиссаси бор. Шунингдек, мазкур функция трафикни ҳам сезиларли даражада тежайди – интернет арзон бўлмаган ҳудудлар аҳолиси учун бу жуда муҳим.
ЎҚИНГ: Keepsafe Browser – анонимликни таъминловчи янги бепул мобил браузер
Тўртинчидан, Firefox Rocket аъло даражадаги функционалликка эга. Биламизки, айрим ҳолларда дастурчилар бирор илованинг тезкорлиги ва ихчамлигини таъминлаш учун унинг айрим функцияларини «қирқиб» ташлашади. Аммо Mozilla’нинг янги браузерида бу борада «олтин ўрталик»ка эришилган.
Булардан ташқари, «реактив» браузер кўп варақали интерфейси, веб-саҳифалардан скриншотлар ола билиши ва ҳатто PWA технологиясини қўллаб-қувватлаши билан ҳам мақтанса арзийди. Айтиб ўтиш керакки, PWA – айрим сайтларни тўлақонли илова сифатида ишлатиш технологияси бўлиб, Firefox Rocket ҳам шундай функцияга эга.
Google Play иловалар каталогида Firefox Rocket айни дамда расман фақат Индонезиядаги фойдаланувчилар учун тақдим этилган. Лекин, агарда сиз ҳам ушбу «енгил», тежамкор ва ўта тезкор браузердан фойдаланишни истасангиз, уни мана бу ҳавола орқали APKMirror сайтидан кўчириб олиб, мустақил тарзда ўрнатишингиз мумкин.
