Қасоскорлар смартфони: OnePlus 10Т Marvel Edition
OnePlus компанияси ўзининг янги телефонларидан бири - OnePlus 10Т моделининг Marvel суперқаҳрамонлари стилидаги янги версиясини ҳафта охирида Ҳиндистон бозорига чиқаради.
Махсус нашрдаги смартфоннинг ўзига хос катта қутиси қора рангли OnePlus 10Т ва Marvel'нинг бир нечта суперқаҳрамонларидан илҳомланиб тайёрланган аксессуарлар – Темир Одам ҳимоя кейси, Капитан Америка қалқони стилидаги юмалоқ тутқич ва Қора Пантера телефон ушлагичини ўз ичига олади.
Таъкидлаш жоизки, бу хитойлик смартфон ишлаб чиқарувчисининг Marvel билан биринчи марта ҳамкорлик қилиши эмас: бир неча йил аввал компанияси ўзининг OnePlus 6 Marvel Avengers версиясини чиқарган эди.
OnePlus 10Т Marvel нашри 16/256 ГБ хотира конфигурациясида 56,000 ҳинд рупияси ёхуд 7,597,000 сўм атрофидаги нархида сотувга чиқарилади. Афсуски, компания ушбу версиянинг бошқа бозорларга чиқарилишини очиқламаган.
