Қўш камерали ва катта FHD+ экранли Galaxy A8 Star селфифони тақдим этилди
Samsung компаниясининг Galaxy Note 9 фаблети шу кунларда савдога чиққанидан хабарингиз бор. Жанубий кореялик гигант яна Android 8.0 (Oreo) операцион тизим талқини бошқаруви остида ишловчи Galaxy A8 Star телефонини ҳам расман намойиш этди.
ЎҚИНГ: Samsung Galaxy A туркумида янги – A10, A30, A50, A70 ва A90 смартфонлари чиқади!
Мазкур қурилма FHD+ форматли, 6,28 дюймлик Super AMOLED Infinity дисплейга эга. Экран тепасидан f/2,0 максимал диафрагмалик, 24 мегапикселли камера жой олган. Смартфоннинг асосий камераси эса қўшалоқ – 16 ҳамда 24 мегапикселли датчикларни ўз ичига олган.
Galaxy A8 Star техник таъминотининг асосини Snapdragon 660 процессори ташкил этади. Qualcomm ишланмаси бўлган ушбу чип 2,2 ГГц.гача такт частотали саккизта Kryo 260 ядросини, Adreno 512 график контроллерини ҳамда 600 Мбит/сониягача тезликда маълумот алмашувчи X12 LTE уяли модемини ўз ичига олган.
ЎҚИНГ: Qualcomm: Galaxy S10 ҳам янги iPhone’лардек қудратли процессорга эга бўлади!
Samsung’нинг янги смартфони 6 гигабайтлик тезкор ҳамда 64 гигабайтлик доимий хотирага эга; яна унда microSD хотира картаси учун уяча ҳам мавжуд. Девайсга Wi-Fi 802.11ac (2,4/5 ГГц) ва Bluetooth 5 LE, GPS/ГЛОНАСС ҳамда NFC модуллари ўрнатилган. Корпуснинг орқа панелидан дактилоскопик сенсор ҳам ўрин олган.
Galaxy A8 Star корпусининг ўлчамлари 162,4х77,0х7,55 миллиметрга, вазни эса 188 граммга тенг. Уни қувват билан 3700 мА/соатлик ток сиғимли аккумулятор таъминлаб туради.
Samsung бу смартфонини тахминан 500 АҚШ доллари нархида сотишни кўзламоқда. Унинг аллақачон савдога чиқарилган аксарият моделлари, жумладан, сўнгги русумдаги планшетофони ҳам юртимизда расмий кафолат билан сотилмоқда.
