Qualcomm арзон 5G-смартфонлар учун Wi-Fi 6’ни ҳам қўлловчи Snapdragon 690 чипини чиқарди
Бешинчи авлод уяли алоқа тармоғида ишловчи ҳамёнбоп смартфонлар одатда Snapdragon 765G чипсети ёки Mediatek компаниясининг турли процессорлари базасида тайёрланмоқда. Лекин яқин орада вазият ўзгаради – бугун Qualcomm ўзининг энг арзон 5G-процессорини тақдим этди.
ЎҚИНГ: AnTuTu янги рейтингда ҳар кимнинг жойини кўрсатиб берди (2020 йил май)
Янги маҳсулот Snapdragon 675 давомчиси сифатида, 8 нанометрлик технологик жараён асосида тайёрланган ва Snapdragon 690 деб номланган. Мазкур чипсет автоном ва ноавтоном тармоқ архитектуралари (SA ва NSA) билан мосликда ишловчи Snapdragon X51 русумли 5G-модемни ҳам ўз ичига олади.
Snapdragon 690 процессорининг марказий ядролари саккизта: 2.0 ГГц.гача такт частотасида ишловчи иккита ARM Cortex-A77 ядроси, 1.7 ГГц.лик олтита ARM Cortex-A55 ядроси. Унинг жамланмасига кирган Adreno 619L график тезлатгичи эса графикани Snapdragon 675 процессоридагидан кўра 60 фоизга тезроқ қайта ишлай олади.
ЎҚИНГ: Samsung арзонроқ 5G-смартфонлар учун янги процессор тақдим этди
Qualcomm’нинг ушбу чипсети смартфоннинг камераси 192 мегапикселликкача бўлишига, сониясига 30 кадр тезлигида 4K сифатли HDR-видео ёзиб олишига имкон беради. Ушбу процессор шарофати билан телефоннинг дисплейи FHD+ форматигача, унда кадр янгиланиш частотаси эса 120 герцгача бўлиши мумкин. Snapdragon 690 яна FastConnect 6200 тезкор уланиш тизимига янги авлод – Wi-Fi 6 тармоғини, шунингдек, Quick Charge 4+ тезкор қувватлаш технологиясини ҳам қўллаб-қувватлайди.
Snapdragon 690 базасидаги илк қурилмалар шу йилнинг иккинчи ярмида пайдо бўлади. Ҳозирда HMD Global, LG, Motorola, Sharp, TCL ва Wingtech компаниялари ушбу чипсетни ўзларининг янги моделларида қўллашларини айтишган. Аммо ҳали бу процессор тақдим этилмасиданоқ хитойлик бир компания унинг базасида энг арзон 5G-смартфон тайёрлаётгани маълум бўлган...
