Qualcomm ғиромликда гумонланмоқда: рақобатчиларни синдириш учун нархлар атай туширилган

Яқиндагина Еврокомиссия Google’ни жазолаган эди, энди эса ушбу ташкилот Qualcomm компанияси билан жиддий шуғуллана бошлади. Худди Google билан боғлиқ воқеа каби, Qualcomm ҳам ғирром ўйин ўйнаганликда ҳамда мобиль процессорлари бозорида адолатли рақобатни бузганликда гумон қилинмоқда.

Еврокомиссиянинг фикрича,  2009 йилдан то  2011 йилгача Qualcomm ўз маҳсулотлари нархини «қайта таҳрир қилган». Бу иш  Nvidia ва Icera каби асосий рақобатчиларни йўлдан олиб ташлаш мақсадида қилинган. Гап шундаки, компания маҳсулот нархларини кўтариш ўрнига, ўзининг нархидан ҳам арзон сотган.

Биринчи шубҳа 2015 йилда рақобатчилардан бири, Американинг  чиплар ишлаб чиқарувчи йирик Icera  компаниясининг Qualcomm устидан шикоят қилганида пайдо бўлган эди.  Энди эса, Еврокомиссия жиддий текширув ўтказишни мўлжалламоқда.

Агар айбловлар ўз тасдиғини топса, Qualcomm’ни йиллик айланма маблағининг ўн фоизи миқдорида жарима кутмоқда. Масалан, 2009 йилда компаниянинг йиллик маблағ айланмаси 10.4 миллиард долларни ташкил этганди, 2017 йилга келиб бу кўрсаткич 22 миллиард доллардан ошиб кетди.

Ўз навбатида, Qualcomm компанияси раҳбарияти ушбу айбловни рад этмоқда ва шундай баёнот бермоқда: «Qualcomm амалиёти рақобатга асосланган ва Европа рақобатчилик қоидаларига тўла мос келади».

Дарвоқе, бундай айблов ва судда ўзини ҳимоя қилиш ҳолатлари мазкур компания учун биринчиси эмас. Авваллари Apple Qualcomm компаниясини нархни оширишда айблаган эди, Intel  эса унинг устидан рақобатда ғирромлик қилгани учун шикоят қилганди. Шу йилнинг бошида эса Еврокомиссиянинг монополияга қарши курашни мувофиқлаштирувчи  бўлими  Qualcomm компаниясини ўша Apple’ни пул билан сотиб олишда айблаб, 997 миллион евролик (1,23 миллиард доллар) жаримага тортганди.