Qualcomm ҳам «дамини олаверсин»: энг кучли, лекин ҳамёнбоп MediaTek Helio M70 5G тақдим этилди!
Кечагина Arm компанияси янги маҳсулотлари – Arm Cortex-A77 процессор ядроси ва Arm Mali-G77 график чипини расман намойиш этган эди. Бугун эса MediaTek компанияси мазкур компонентларни ўз ичига олган чипсетини эълон қилди.
ЎҚИНГ: Смартфон танлашда нималарга эътибор қаратиш лозим? (Процессор)
Тайвань компанияси тақдим этган бу процессор MediaTek Helio M70 5G деб аталади ва унинг асосий хусусияти номидан ҳам англашилиб турибди. Бешинчи авлод уяли алоқа тармоғида ишлай олувчи бу чипсет таркибига кирган 5G-модем 6 ГГц.дан паст диапазонларни қўллаб-қувватлайди.
MediaTek Helio M70 5G етакчи чипсоз – Qualcomm’нинг айни дамдаги барча процессорларидан ҳам кучлидир! Америкалик компанияда ҳозирча 5G-модемли процессор ишлаб чиқармаган, энг янги Arm Cortex-A77 ядролари ҳақида-ку гапирмаса ҳам бўлади. Шу боисдан ҳам MediaTek маҳсулотини ҳозирда энг илғор мобил платформа ҳисобланади, аммо унинг базасидаги смартфонлар ҳали келаси йил бошидагина тақдим этилиши айтилмоқда.
Билсангиз керак, ушбу компания процессорлари нисбатан арзон моделларда қўлланиб келади. MediaTek Helio M70 5G базасидаги смартфонлар 500–600 долларлик флагман моделлар бўлиши тахмин қилинмоқда. Айни дамда Qualcomm’нинг энг илғор процессорига эга бўлган энг арзон флагман – Redmi K20 Pro нархидан келиб чиқиб, тайванлик чипсознинг янги процессорига эга смартфонлар ҳам камида шу атрофда баҳоланса керак.
ЎҚИНГ: Redmi K20 Pro: «катта иблис» Geekbench’да ҳам ўз кучини кўрсатди!
