«Qualcomm, нарироқ сурил!» – MediaTek иккинчи 5G-процессорини тақдим этди
Ўтган ойда MediaTek компанияси 5G тармоқларини қўлловчи, 7 нанометрлик тех-жараёнга асосланган Dimensity 1000 чипсетини тақдим қилган эди. AnTuTu бенчмаркининг эталон тестида у Snapdragon 855+ ва ҳаттоки Apple A13 Bionic процессорларини ҳам енгиб, рекорд ўрнатган.
ЎҚИНГ: Биринчи «ўлдириб бўлмас» 5G-смартфон энг кучли процессорга ҳам эга!
Тайванлик ушбу чипсоз декабрнинг охирида иккинчи 5G-процессорини намойиш этиши айтилаётганди ва шундай бўлиб чиқди ҳам. MediaTek’нинг янги маҳсулоти Dimensity 800 деб аталган ва ўрта нархли смартфонларга мўлжалланган.
Dimensity 800 кейинги йилнинг биринчи чорагида оммавий ишлаб чиқарила бошлайди; унга асосланган биринчи қурилмалар эса иккинчи чоракда чиқса керак. Бироқ интернетда аллақачон Redmi 9 (ёки Redmi 9 Pro) смартфонида айнан мана шу чипсет қўлланиши ҳақида гап-сўзлар тарқалмоқда.
ЎҚИНГ: Xiaomi компанияси Redmi 8’дан нақ икки карра кучли арзон смартфон тайёрлаяпти!
Янги процессорнинг имкониятлари ҳозирча ошкор этилмай турибди, лекин асосий параметрлари аллақачон маълум. Dimensity 800 иккита кластердан иборат: улардан биринчиси 2,6 ГГц такт частотали тўртта Cortex-A77 ядросини ўз ичига олса, иккинчиси 2,2 ГГц частотасида ишловчи тўртта Cortex-A55 ядросидан иборат. Шунингдек, чипсет жамланмаси таркибига Mali-G77 MP9 график тезлатгичи ва албатта, бешинчи авлод уяли алоқа тармоқларини қўллаб-қувватловчи Helio M70 русумли 5G-модем ҳам қўшилган.
Хусусиятларига қараганда, Dimensity 800 америкалик чипсознинг Snapdragon 765/765G процессорлари билан беллаша олади; аммо ҳали уни бенчмаркларда текшириб, имкониятларини баҳолаб кўрсатишмаган. Умумий ҳисобда эса MediaTek компанияси 5G-модемли процессорлар сони бўйича 2:1 ҳисоби билан Qualcomm’дан олдинда.
ЎҚИНГ: Speedtest синови: Samsung, Apple ва Huawei – қай бирида интернет энг тезкор?
