Qualcomm Нидерландиянинг NXP Semiconductors фирмасини 47 миллиард долларга сотиб олади
АҚШнинг мобил процессорлар ишлаб чиқарадиган Qualcomm фирмаси Нидерландиянинг NXP Semiconductors компаниясини 47 миллиард долларга сотиб олишни режалаштирган. Business Insider нашрининг маълум қилишича, ушбу битим яримўтказгичлар саноати тарихида энг йирик келишув ҳисобланади. Qualcomm келишувни 2017 йилда тугатиш мақсадида. Агар ушбу битим амалга ошса, бирлашган йирик компанияларнинг йиллик даромади 30 миллиард долларга тенг бўлиши мумкин.
Мазкур эълондан кейин Qualcomm компаниясининг биржадаги акциялари нархи 3,7 фоизга кўтарилган, NXP Semiconductors фирмасининг акцияларида эса 1,9% ўсиш қайд этилган.
NXP Semiconductors ёрдамида жаҳоннинг энг йирик мобил процессорлар тайёрлайдиган фирмаси смартфонлар бозорига бўлган боғлиқлигини бироз сусайтириши кутилмоқда. Сабаби мобил қурилмаларга бўлган талабнинг тушиши ҳамда Хитой ва Тайвандаги рақиблари туфайли Qualcomm аллақачон турли молиявий қийинчиликларни бошидан ўтказган.
NXP Semiconductors 2015 йилда автомобилларга турли электроника маҳсулотлари ишлаб чиқарадиган Freescale Semiconductor компаниясини 12 миллиард долларга харид қилган эди.
