Qualcomm ўрта синф смартфонлари учун янги чипсетни тақдим қилди!

Qualcomm ўрта синф смартфонлари учун янги чипсетни тақдим қилди!

Qualcomm компанияси ўрта синф смартфонлари учун мўлжалланган Snapdragon 7+ Gen 2 чипсетини тақдим қилди. Қизиғи шундаки, компания бундан аввал Snapdragon 7+ Gen 1 ёки Snapdragon 7 Gen 2 чипсетини чиқармаган. Ушбу сериясида охирги чипсет эса Snapdragon 7 Gen 1 эди ва биз уни аллақачон бир қанча қурилмаларда кўрганмиз.

Snapdragon 7+ Gen 2 ишлаш ва қувват самарадорлигида сезиларли яхшиланишларни таклиф қилади. Унинг Kryo асосий процессори 2.91 гигагерц тезликда ишлайди. Бутун бошли процессор (1+3+4) Snapdragon 7 Gen 1 билан таққослаганда 50% га яхшироқ.

Графика борасида эса SD 7+ Gen 2 номаълум Adreno график картасига эга ва у 2 карра яхшиланган ҳамда 13% га самаралироқдир. Шунингдек, платформа Auto Variable Rate Shading – ўйинларда қувват ва ресурсларни тежаш учун орқа фонни паст резолюцияда қолдирган ҳолда олдинги саҳналарини юқори резолюцияда кўрсатадиган функция ва Snapdragon 8 Gen 1 билан тақдим қилинган Volumetric Rendering хусусиятларини ўз ичига олади. Ҳа, айтганча, чипсет 16 GB гача бўлган оператив хотирани кўтара олар экан.

Сунъий интеллект ҳақида гап кетганда эса Qualcomm'нинг СИ двигатели 2 карра яхшиланган ишлаш ва ҳар бир ватт учун 40% батарея тежашни таклиф қилади. Батареяга келганда шуни айтиш керакки, чипсет Quick Charge 5 билан смартфонни 0 дан 50% гача атиги 5 дақиқада зарядлаш имконини бериши айтилмоқда.

Тасвирга олиш томонида эса чипсет 30 та тасвирни битта суратга жамлаш орқали кам ёруғликда ҳам яхши суратлар олиш имконини берадиган 18 битли Triple ISP технологияси билан бирга 200 MP камера сенсори ва 4К формартида HDR видео олишни қўллаб-қувватлайди.

Алоқага келадиган бўлсак, чипсет Snapdragon Х62 5G Modem-RF тизимига эга – бу билан секундига 4.4 Gb гача бўлган тезликда маълумотларни юклаш мумкин. Ва, албатта, Wi-Fi 6/6E технологиялари ҳам бор. Энг муҳими, ушбу чипсет иккилик SIM-картада ҳам 4G ёки 5G да Dual Active функциясига эга, яъни бу сиз иккала SIM-картангизда ҳам бир вақтнинг ўзида қўнғироқларни қабул қилсангиз бўлади дегани.

Маълум бўлишича, TSMC томонидан ишлаб чиқариладиган ушбу 4 нанометрли Snapdragon 7+ Gen 2 билан жиҳозланган илк смартфонлар шу ойдаёқ чиқарилади ва улар Redmi ёки Realme қурилмалари бўлиши мумкин.

Сайт янгиликларидан доимий хабардор бўлиш учун Телеграм каналимизга қўшилинг!