Qualcomm тўртта янги чипни тақдим этди
Qualcomm компанияси тўртта янги чипни тақдим этди. Уларнинг иккитаси ҳозирда мавжуд бўлган чипларнинг Plus версияси ҳисобланади. Асосий эътибор 5G тармоғига қаратилган, аммо 4G учун ҳам янги имкониятлар мавжуд. Бундан ташқари, чипларнинг тўрттадан учтаси 6 нанометрлик жараён асосида яратилган.
ЎҚИНГ: Snapdragon 898 ва Dimensity 2000 чипларининг техник жиҳатлари маълум бўлди
Snapdragon 778G+
Snapdragon 778G ўрта тоифадаги чип ҳисобланса-да, яхши унумдорлик даражасини беради. Янги чип эса бунданда яхшироқ унумдорликни таклиф этади.
Kryo 670 ядроси энди 2,5 гигагертс частотада ишлайди. Бундан ташқари, Adreno 642L график процессори ҳам кучайтирилди, бу эса 20% юқори ишлаш унумдорлигини таклиф этади. X53 5G модеми аввалги Snapdragon 778G чипига ҳам ўрнатилган эди.
Snapdragon 695
Ушбу чип Snapdragon 690'нинг янги давомчиси бўлиб, у mmWave 5G тўлқинини қўллаб-қувватлайди (Snapdragon 690'да ушбу имконият йўқ эди). Шунингдек, процессор унумдорлиги 15% га, график процессор унумдорлиги эса 30% га ошди. Чунки чипга янги Kryo 660 ядроси ҳамда Adreno 619 график процессори ўрнатилди.
Чипдаги яна бир катта ўзгаришлардан бири - бу унинг 6 нанометрлик жараён асосида яратилганлигидадир. Бу эса энергияни тежашга катта ёрдам беради. Аввалги Snapdragon 690 чипи эса 8 нанометрлик жараён асосида яратилган эди.
Snapdragon 680
Ушбу чип 4G LTE модемига эга. Snapdragon 680 ҳам ўрта тоифадаги чип ҳисобланади. Чип янги ва эски компонентлардан ташкил топган. Юқоридаги чиплар каби Snapdragon 680 ҳам 6 нанометрлик жараён асосида яратилган. Чип янгиланган Kryo 265 ядроси билан жиҳозланган. Шунингдек, у янги Adreno 610 график процессорига эга.
Янги чип ўз навбатида камера имкониятларини ҳам яхшилайди. Чунки унда учталик тасвир сигнал процессори ҳамда битта Spectra 346 ядроси мавжуд. Улар чипсетга бир вақтнинг ўзида учта камерадан олинган тасвир маълумотларини қайта ишлаш имконини беради.
Snapdragon 480+
Snapdragon 480 Qualcomm компаниясининг 5G модемли биринчи 400 серияли чипсети бўлиб, уни ҳамёнбоп 5G смартфонларда учратиш мумкин. Янги чип эса Snapdragon 480'нинг тезкорроқ талқини ҳисобланади.
Snapdragon 480+ чипи нисбатан эскироқ бўлган Kryo 460 ядроси ҳамда Adreno 619 график процессори билан жиҳозланган. Шунингдек, у 8 нанометрлик жараён асосида яратилган. Шундай бўлса-да, асосий ядро энди 2.2 гигагертсда ишлайди (Snapdragon 480 чипида 2.0 гигагертс эди). График процессорнинг ишлаш тезлиги ҳам ошди.
Ушбу чип 1080p+ резолюциядаги дисплейларни 120Hz гача тезликда бошқариши мумкин, Snapdragon 680 эса фақат 90Hz гача бўлган частотани қўллаб-қувватлайди. Бундан ташқари, ушбу чип X51 модемига эга бўлиб, 5G тармоғини қўллаб-қувватллайди.
Бундан хулоса қилиш мумкинки, Snapdragon 680 энергия самарадорлигига эга бўлса, Snapdragon 480+ нисбатан юқорироқ унумдорликни тақдим этади.
Ҳозирдан смартфон ишлаб чиқарувчи компаниялар ушбу чипларни сотиб олишишга кришишган. Мисол учун, Nokia компанияси Snapdragon 480+ чипига қизиқмоқда. Компания аввалроқ ўз смартфонларини Snapdragon 480 чипи билан жиҳозлаган эди. Oppo 5G тармоғига эга бўлган Snapdragon 695 чипига қизиқётган бўлса, Xiaomi ҳам Snapdragon 695 ҳамда 778G+ чипларини сотиб олиш ниятида.
