Қўш модулли камерага эга Honоr 8 Pro тақдим қилинди

Қўш модулли камерага эга Honоr 8 Pro тақдим қилинди

5 апрел куни Huawei компанияси Honоr 8 Pro, яъни март ойида намойиш қилинган Honor V9 флагманининг халқаро талқинини намойиш қилди. Унинг муҳим жиҳати сифатида Sony’нинг IMX286 русумидаги сенсорларидан иборат қўш объективли бош камерасини айтиш мумкин.

Ҳар бирининг сиғими 12 мегапикселли бўлган модулларнинг ёруғлик қабул қилувчи оптик прибори f/2.2 стандартига тенг, яъни жуда юқори. Камера датчикларидан бири манзарани оқ-қора, бошқаси рангли муҳрлайди. Натижада, улар бирлашиб, ягона — деталларга бой сурат ҳосил бўлади. Олд камера учун апертураси f/2.0 бўлган 8 Мп сенсор танланган.

Honor 8 Pro смартфони диагонали 5,7 дюймли, сиғими QHD (2560х1440 пикселли) дисплей, 4000 мА соат электр токини жамладйиган, тезкор қувват олиш функциясига эга аккумулятор билан таъминланган. Ишлаб чиқарувчининг кафолат беришича, тўлиқ қувват 30 соатлик суҳбатга, 10 соатлик видео томоша қилишга етади. Гаджет ички платформасида 8 ядроли Kirin 960 процессори, LPDDR4 стандартидаги 6 Гб оператив хотира, 64 Гб доимий хотира, 128 Гб хотира картасини ўқийдиган microSD бўлмачаси мавжуд.

Honor 8 Pro 2 та сим-картада ишлайди. У алоқанинг Wi-Fi, Bluetooth, GPS, 4G LTE ва NFC тармоқларини қўллаб-қувватлайди. Шунингдек, корпусида универсал, яъни ҳам қувват олишда ва маълумотлар алмашишда фойдаланиладиган USB Type-C порти бор.

Honоr 8 Pro Android 7.0 Nougat’нинг ўзлаштирилган EMUI 5.1 талқинида фаолият кўрсатади. Гаджет оғирлиги 184 грамм. Смартфон Европада 20 апрелдан 549 евро баҳосида сотила бошлайди.