РАСМАН: Қайишқоқ дисплейли «раскладушка» – Motorola RAZR намойиш куни аниқ!
Motorola брендининг RAZR русумли афсонавий «раскладушка» телефони «қайта тирилиши» ҳақидаги миш-мишлар 2017 йилиёқ пайдо бўла бошлаганди. Кейинроқ эса унинг буклама экранли смартфон бўлиши хабар қилинди, тағин февралда сотувга чиқиши ва нархи ҳам маълум эканлиги айтилган...
ЎҚИНГ: Қайта тирилган афсона – ишлаётган ҳолдаги буклама экранли Motorola RAZR 2019’ни видеода кўрамиз!
Икки йиллик сизиб чиққан маълумотлар ва турфа миш-мишлардан сўнг, ниҳоят, Motorola ўзининг RAZR букламафони тақдимот кунини эълон қилди. CNET нашрига компания жўнатган таклифномага кўра, ушбу «раскладушка»ни 13 ноябрь куни намойиш қилишади.
Тақдимот тадбири Лос-Анжелес шаҳрида, «An original unlike any other» («Бошқалардан фарқли оригинал») шиори остида ташкил этилади. Компания бу билан мазкур гаджетнинг экрани тиккасига букилишига ишора қилаётган бўлса керак.
ЎҚИНГ: Samsung вертикалига букланувчи букламафонни патентлади
Шу пайтгача аниқланган маълумотларга кўра, Motorola RAZR моделининг кодли номи – Voyager. Бозорга эса уни Motorola RAZR 2019 ёки Motorola RAZR V3 номи остида тақдим этишлари мумкин.
Бундан ташқари, ушбу смартфоннинг қадоғи билан бирга туширилган сурати ҳам тарқалди:
Гаджетнинг асосий – эгилувчан дисплейи диагоналига 6.2 дюймлик, тасвир аниқлиги 2142х876 пикселлик. Бундан ташқари, қурилма ёпилганида ташқарида қолувчи – билдиришномаларга мўлжалланган, 800х600 пикселлик қўшимча экран ҳам бор.
Янгиланган Motorola RAZR аппарат таъминоти асосини Qualcomm Snapdragon 710 процессори ҳамда 4/6 гигабайтлик тезкор хотира ташкил этади. Унинг аккумулятори 2750 мА/соатлик ток сиғимига эга бўлиб, 27 ваттлик TurboPower тезкор қувватлаш технологиясига эга.
Компания ушбу қурилмасини Black, White ҳамда Gold рангли корпусларда таклиф этади. Унинг нархи 1500 АҚШ доллари атрофида бўлиши кутилмоқда. Шунингдек, унинг чекланган миқдорда чиқарилиб, фақат айрим мамлакатлардагина сотилиши эҳтимоли юқори.
