Расман: Redmi K60 серияси тақдим этилди
Кеча Xiaomi суббренди ҳисобланувчи Redmi катта тақдимот ўтказиб, унда ўзининг янги гаджетларини тақдим этди.
Янги Redmi K60 серияси учта смартфондан иборат. Булар: Snapdragon 8 Gen 2 чипли Redmi K60 Pro, Snapdragon 8 Gen 1 чипида ишловчи Redmi K60 ҳамда Dimensity 8200 чипли Redmi K60E моделлари ҳисобланади.
Redmi K60 Pro
Сериядаги энг премиум бўлган ушбу смартфон 6.67 дюймли AMOLED дисплейи билан жиҳозланган. Унинг резолюцияси 2K бўлиб, бу QHD ва FullHD резолюцияларининг ўртаси ҳисобланади. Промо суратдаги маълумотларга кўра, смартфон дисплейининг ёрқинлик даражаси 1400 нитгача боради. Дисплей юқори қисмидан 16МП селфи камера ўрин олган.
Дисплей, шунингдек, 120 гертс янгиланиш, 480 гертс сенсорли намуна олиш частоталарини ҳамда HDR10+ функциясини қўллаб-қувватлайди. Бармоқ изи сканери дисплей остига ўрнатилган. Redmi Auto Brightness 2.0 алгоритмини тақдим этди. Ушбу алгоритм фойдаланувчи қурилмадан қандай фойдаланишини вақт ўтиши билан ўрганади ва уни ҳар бир жараён учун керакли бўлган ёрқинлик таъминлайди.
Компания асосий урғуни қурилманинг асосий камерасига қаратган. Смартфонга 50МП Sony IMX800 сенсори ўрнатилган бўлиб, у оптик ҳамда электрон стабилизацияга эга. Сунъий интеллект фильтри энди суратга олинаётган объектларни яхши аниқлай олади. Қолган икки камерада мақтайдиган ҳеч қандай нарса йўқ - 8МП ультракенг ҳамда 2МП макро.
K60 Pro учун Xiaomi ўзининг Surge P1 чипини таклиф қилади. Смартфонга 120 ваттда қувват олувчи 5,000 мАс сиғимли аккумулятор ўрнатилган. Чип эса қувватланиш жараёнини назорат қилади. Тўлиқ қувватланиш учун смартфон 19 дақиқа вақт сарфлайди.
Гаджет 30 ваттда симсиз қувват олишини энг катта ижобий ўзгаришлардан бири десак янглишмаймиз. Редми айнан 30 ваттда симсиз қувват бериши мумкин бўлган қурилмани ҳам тақдим этди. Смартфон ичига совутиш қопламаси ҳам ўрнатилган.
Redmi K60 Pro моделининг яшил, оқ, қора ранглари, шунингдек, Champion Performance Edition версияси мавжуд. Қурилманинг нархи қуйидагича:
8/128ГБ - 475 доллар
16/512ГБ - 660 доллар.
Смартфон 31 декабрь санасида сотувга чиқади.
Redmi K60
Ушбу модель ташқи кўринишидан Pro моделдан унча фарқ қилмайди. Унга ҳам 6.67 дюймли AMOLED дисплей, учта камера ҳамда совутиш қоплами ўрнатилган.
Смартфоннинг оқ, яшил, кўк ва қора рангли турлари мавжуд. Унинг нархи қуйидагича:
8/128ГБ - 360 доллар
16/512ГБ - 515 доллар.
Pro модель каби K60 ҳам 31 декабрь санасида сотувга чиқади.
Redmi K60E
Redmi K60E - “E“ ҳарфи бўлган “K“ сериясидаги биринчи смартфон. Xiaomi “E“ ҳарфи ортида нима яширинганига аниқлик киритмади. Смартфон техник кўрсаткичлари бўйича унчалик ёмон эмас.
Қурилмага 120 гертсда ишловчи 6.67 дюймли AMOLED дисплейи ҳамда Dimensity 8200 чипи ўрнатилган. Дисплей Gorilla Glass Victus ойнаси билан ҳимояланган. Унинг ёрқинлик даражаси 1200 нитни ташкил қилади.
Орқа панелда учта камера жойлашган, булар: оптик стабилизацияга эга 48МП асосий камера, 8МП ультракенг камера ҳамда 2МП макро камера. Аккумулятор сиғими ва қувватланиш тезлиги бўйича ушбу модель К60 билан бир хил - 67 ватт қувватланиш тезлиги, 5,500 мАс аккумулятор сиғими. Аммо унда симсиз қувватланиш имконияти мавжуд эмас.
Шунингдек, К60E моделига UFS 4.0 ҳамда LPDDR5X ўрнига UFS 3.1 ҳамда LPDDR5 хотиралари ўрнатилган. Смартфон оқ, қора, яшил рангларда тақдим этилди. Унинг 8/128ГБ хотирага эга нархи 315 доллардан бошланади.
