Расман: Xiaomi 200МП камерали смартфонни тақдим қилди

Расман: Xiaomi 200МП камерали смартфонни тақдим қилди

Бир неча ойлик миш-мишлардан сўнг, Xiaomi расман ўзининг Xiaomi 12Т сериясидаги смартфонларини тақдим қилди. Аввал маълум қилинганидек, қаторда икки модел бор: Xiaomi 12Т ва Xiaomi 12T Pro. Улардан Pro модел компания тасдиқлаганидек 200МП камерага эга.

Xiaomi'нинг ушбу янги премиум смартфонлари ҳам аввалги Xiaomi 12 флагманлариникига ўхшаш дизайнда: орқа томонида учта камерани ва LED чироқни ўз ичига олган камера ороли, олд томонининг юқори марказида эса юмалоқ тешикли селфи камера билан чиқарилди.

Xiaomi 12Т дан бошлайдиган бўлсак, оддий модел камера борасида янгиликларга эга эмас. У 108МП асосий орқа камерага эга. Xiaomi 12T Pro эса 200 мегапикселли камерага эга дунёдаги иккинчи смартфон бўлиб, 8P линзалардан ташкил топган сенсор ўлчами 1/1.22 дюймни ташкил қилади ва у 16 пикселларни 1 тага жамлаш технологиясидан фойдаланади. F1.69 диафрагмали камера тасвирни оптик барқарорлаштириш (OIS) хусусиятига эга. Шунингдек, компания камера билан боғлиқ бир нечта қўшимча функцияларни ҳам тақдим қилди. Улардан бири ProCut хусусияти бўлиб, у сунъий интеллектга асосланган ва суратдаги перспективни аниқлаб сизга тасвирни бир нечта кесилган вариантларини тақдим қилади. Таъкидлаш жоизки, камера тунда ҳам юқори тиниқликдаги тасвирларни олиш имконини беради. Камера билан 8К сифатдаги видеолар олиш ҳам мумкин. 

Xiaomi 12T Pro смартфони 4 нанометрли Snapdragon 8+ Gen 1 чипсети билан жиҳозланган бўлса, Xiaomi 12Т модели MediaTek'нинг 5 нанометрли Dimensity 8100 Ultra чипига эга ва улар MIUI 13'да ишлайди. 8/12ГБ оператив ва 128/256 ГБ доимий хотира билан келадиган смартфонлар 5000 мА/с батарея сиғимига эга. Бу билан смартфон экрани 13.5 соат тинимсиз ёниқ тура олади ёки сиз 7.8 соат тинимсиз ўйинлар ўйнашингиз мумкин. Қувват тугаганида эса смартфонни 120 Вт тезлик билан19 минутда тўлиқ зарядлаб олишингиз мумкин. 

Xiaomi 12Т смартфонларининг 6.67 дюймли CrystalRes AMOLED экрани 2712х1220 резолюция ва 120 герц янгиланиш тезлигига эга. Сериядаги Pro модел экрани эса мослашувчан HDR хусусиятига ҳам эга. Қўшимчасига смартфонлар Dolby Atmos'ни қўллаб-қувватлайдиган иккилик овоз кучайтиргичларга эга. Смартфонлар 3 йиллик Android ва 4 йиллик хавфсизлик янгиланишларини қабул қила олишади.

Нархларга келадиган бўлсак, Xiaomi 12T Pro моделининг 8/128ГБ вариантдагиси 749 евро, худди шундай хотира конфигурацияли Xiaomi 12Т эса 599 евро бўлиши маълум қилинди. Улар 13 октабрдан бошлаб кулранг, қора ва кўк рангларда сотувга чиқарилади.

ЎҚИНГ: Сентябрнинг энг кучли ўрта-флагман смартфонлари топ ўнталиги

Сайтимизнинг энг чиройли расмларини Инстаграмдаги саҳифамизда томоша қилинг!