Razer компанияси Италия бренди билан ҳамкорликда ўзининг илк мода кўзойнокларини тақдим қилди
Гейминг аксессуарлари билан танилган Razer компанияси Италиянинг Retrosuperfuture бренди билан ҳамкорликда ўзининг янги "Razersuperfuture" номли кўзойнокларини тақдим қилди. Айтиш керакки, бу Razer'нинг илк кўзойнаклари эмас. Бир неча йил аввал компания ўзининг Anzu Smart Glasses ақлли кўзойнакларини чиқарган эди. Бироқ, Razersuperfuture у каби "ақлли" эмас ёхуд сиз унда ҳеч қандай техник хусусиятларни топа олмайсиз.
Маълум бўлишича, Razersuperfuture кўзойнаклари кўпроқ мода учун чиқарилган бўлиб, уларнинг дизайни D-Cave томонидан яратилган. Қалин рамкали кўзойнакларнинг пастки қисми чанғи учувчилар кўзойнакларини эслатиб юборади, лекин Razer дизайнни кўча ва спорт кийимларидан илҳомланиб тайёрланганлигини таъкидлайди.
Гарчи ақлли бўлмаса ҳам, Razersuperfuture кўзойноклари фойдали хусусиятларга эга. Масалан, унинг ойналари фотохромик линзалар ҳисобланади. Бу дегани улар ултрабинафша А ва Б нурларини тўса олади ва қуёш нури тушганида қораяди. Қолаверса, улар телефон ёки монитордан чиқадиган зарарли кўк нурдан ҳам ҳимояга ҳам эга. Кўзойнак оғирлиги 300/350 граммни ташкил қилади.
Razersuperfuture 5 май куни 370 тага чекланган миқдорда сотувга чиқарилади. Унинг нархи 239 АҚШ доллари.
