realme 9 Pro ва realme 9 Pro+ смартфонлари тақдим этилди

Hasanboy
1947
17.02.2022 10:30

realme компанияси ўзининг realme 9 Pro ва 9 Pro+ смартфонларини тақдим этди. Икки қурилма кучли ўрта тоифадаги чип, катта ҳажмдаги аккумулятор, тезкор қувватлаш технологияси ҳамда юқори резолюциядаги асосий камерага эга.

ЎҚИНГ: Samsung Galaxy A23 смартфони Geekbench маълумотлар базасида пайдо бўлди

realme 9 Pro+

realme 9 Pro+ модели 90Hz экран янгиланиш частотасида ишловчи FullHD+ резолюциядаги AMOLED дисплейи билан жиҳозланган. Дисплей остига бармоқ изи сканери ўрнатилган бўлиб, у бир вақтинг ўзида юрак уришини ўлчовчи сенсор вазифасини ҳам бажаради.

5G тармоғини қўллаб-қувватловчи Dimensity 920 чипи ўрта тоифаданинг кучли чипсетларидан бири ҳисобланади. У 6/8ГБ тезкор ва 128/256ГБ доимий хотира билан интеграллаша олади.

Смартфоннинг энг кучли томони бу - унинг камераларида. Қурилмадаги 50МП Sony IMX766 сенсори Oppo Find X3 ҳамда realme GT 2 Pro каби флагман смартфонларга ҳам ўрнатилган. Камера модулидан, шунингдек, f/2.2 диафрагмадаги 8МП ультракенг ва f/2.4 диафрагмадаги 2МП макро камералар ўрин олган.

Дисплей юқори қисмининг чап томонида жойлашган селфи камеранинг резолюцияси 16 мегапикселни ташкил қилади.

realme 9 Pro+ уч хил рангда тақдим этилди. Уларнинг ичида энг қизиқарли ранг Sunrise Blue бўлиб, унинг ранги қуёш нурида кўк рангдан қизғиш пушти рангга ўзгаради. Рангни ўзгартириш учун смартфонни уч сония қуёш нурига қаратиб қўйиш кифоя. Тахмин беш дақиқадан сўнг у яна кўк рангга қайтади.

Смартфондаги 4,500 мАс сиғимли аккумулятор 60 ваттда қувват олади. Тўлиқ қувватланиш учун смартфон 45 дақиқа вақт сарфлайди.

Гаджет Android 12 операцион тизимида ишловчи realme UI 3.0 график қобиғида ишлайди. Унинг Sunrise Black, Aurora Green ва Midnight Black рангдаги турлари тақдим этилди. Қурилманинг нархи қуйидагича:

6/128ГБ - 335 доллар

8/128ГБ - 360 доллар

8/256ГБ 385 доллар

Смартфон 21 февралда сотувга чиқади.

realme 9 Pro

realme 9 Pro янги жуфтликнинг арзонроқ версияси ҳисобланади. Ташқи кўринишидан у ўз “акасига“ жуда ўхшайди. Унга 120Hz янгиланиш частотасида ишловчи 6.6 дюймли дисплей ўрнатилган, бироқ дисплей тури Pro+ каби AMOLED эмас, балки LCD ҳисобланади. Шунинг учун, бармоқ изи сканери ҳам қурилманинг ён томонидан ўрин олган.

realme 9 Pro'га 5G тармоғини қўллаб-қувватлайдиган Snapdragon 695 чили ўрнатилган. Чип 6/8ГБ тезкор ҳамда 128ГБ доимий хотирага эга.

Ушбу модель 64МП асосий камера, 8МП ультракенг камера, 2МП макро камера ҳамда 16МП селфи камера билан жиҳозланган.

Ҳажм жиҳатидан realme 9 Pro модели Pro+ смартфонидан катта бўлганлиги учун ҳам, унга каттароқ 5,000 мАс сиғимли аккумулятор ўрнатилган. Бироқ қувватланиш тезлиги Pro+ моделдан секинроқ - 33 ватт. Қувватлагич смартфон қадоғидан ўрин олган.

Ўз “акаси“ каби realme 9 Pro ҳам Android 12 операцион тизимига асосланган realme UI 3.0 график қобиғида ишлайди.