Realme динамик орол... э, йўғэ, мини капсулали смартфон чиқаради!
Apple'нинг iPhone 14 Pro смартфонларига ўрнатилган "динамик орол" функцияси шубҳасиз энг ақлли юришлардан бўлди, чунки барча смартфон ишлаб чиқарувчилари қутула олмай юрган тирқишдан купертинолик компания жуда унумли фойдаланди. Ва эндиликда хитойлик смартфон брендлари ундан "илҳомланишмоқда".
Гарчи динамик орол хусусиятларга эга бўлмасада, биз аллақачон Xiaomi'нинг Civi 2 смартфонини Apple'нинг iPhone 14 Pro смартфонларида бўлгани каби узунчоқ таблетка шаклидаги тирқиш билан кўрдик. Бундан ташқари, Huawei ўзининг янги смартфонини Apple'никидек динамик орол билан чиқариши миш-миш қилинаётган бир вақтда, Realme ана шундай хусусиятга эга смартфонни тақдим қилишни ростдан режалаштираётган кўринади.
Realme вице-президенти, Мадхав Шет, ўзининг расмий Twitter саҳифасида Realme C сериясидаги янги смартфон тизерини жойлади, лекин номаълум сабабларга кўра у дарҳол ўчириб ташланган. Аммо, интернет аҳолиси уни сақлаб қолишга улгурган ва унда сиз Apple'нинг динамик ороли каби хусусиятга эга янги Realme смартфонини кўришингиз мумкин.
Айтиш керакки, бу ерда тирқиш фақат экран юқори марказида жойлашган селфи камера бўлиши, қолгани эса дастурий таъминот, Realme UI интерфейси билан ишлайдиган функциялар бўлиши мумкин. Суратда ана шундай функцияларнинг бири смартфон қувватланаётган пайтда пайдо бўлишига гувоҳ бўламиз. Apple буни "динамик орол" деб атаган эди, Realme эса уни "Mini Capsule", яъни "мини капсула" деб номлаган.
Афсуски, мини капсулали смартфон айнан қайси модел эканлиги очиқланмаган. Эҳтимол, бу Realme C55 бўлиши мумкинлиги айтилмоқда, лекин нима бўлганда ҳам, у тез орада тақдим қилиниши кутилмоқда.
ЎҚИНГ: Motorola Galaxy Z Flip учун жиддий рақобатчи тайёрламоқда!
