Realme энг кутилаётган – «Тиғ узра югурувчи» смартфонининг айрим хусусиятларини ошкор этди
25 май куни Oppo корпорациясининг RealMe бренди бирданига саккизта девайс тақдим этаётгани ҳақида ёзгандик. Улар орасида Realme Watch, Realme TV, повербанк, симсиз қулоқчин ҳамда смартфон бор.
Realme ушбу янги смартфонини Blade Runner («Тиғ узра югурувчи») кодли номи остида тайёрлаётгани маълум эди, энди унинг бозорга Realme X50 Pro Player Edition номи остида чиқарилиши ҳам аниқ бўлди. Англаганингиздек, у февралда чиққан флагман – Realme X50 Pro 5G моделининг геймерларга мўлжалланган версияси бўлади. Аллақачон сотилаётган стандарт флагман эса AnTuTu бенчмаркининг апрелдаги рейтингида кучли ўнталикка кирган.
Realme X50 Pro Player Edition смартфонига қайтадиган бўлсак, компания унинг баъзи жиҳатларини расман эълон қилди. Унга кўра, «Тиғ узра югурувчи» смартфон диагоналига 6,44 дюймлик Super AMOLED дисплейга эга.
Унинг тасвир аниқлиги FHD+ форматида, янгиланиш частотаси ҳам оригинал моделдаги каби 90 герцлик. Фақат ўйинбоп смартфонда экраннинг сенсор қатлами янгиланиши 180 герцга оширилган – геймерлар учун бу жуда муҳим. Бундан ташқари, Realme таъкидлашича, смартфоннинг дастурий таъминоти ҳам дисплейнинг тезкорлик билан реакция беришига мослаб қайта ишлаб чиқилган.
ЎҚИНГ: AnTuTu янги рейтингда ҳар кимнинг жойини кўрсатиб берди (2020 йил май)
Шунингдек, мультимедияли контент ишқибозлари учун Realme X50 Pro Player Edition модели дисплейида HDR10+ динамик диапазони ҳамда P3 ранг маконининг 100 фоизлик қамрови ҳам жорий этилган. Айтиш керакки, «Тиғ узра югурувчи» смартфони экранида ёрқинлик 1100 кд/м2 бирликкача оширилган.
Realme X50 Pro Player Edition геймерофони Snapdragon 865 процессорига, энг янги ва тезкор – UFS 3.1 туридаги ички ва LPDDR5 тоифали тезкор хотирага эга бўлиши, илғор совитиш тизими билан таъминланиши ҳам кутилмоқда.
ЎҚИНГ: Келажак флагманларининг процессори – Qualcomm Snapdragon 875 ҳақида илк маълумотлар чиқди!
