Realme V3 тақдим этилди – дунёдаги энг арзон 5G-смартфон!
Oppo корпорациясининг арзончи суббренди 1 сентябрь куни ўрта нарх тоифасидаги Realme X7 ҳамда Realme X7 Pro смартфонларини чиқарганидан хабарингиз бор. Булардан ташқари, Realme жаҳондаги энг арзон 5G-смартфонни ҳам намойиш этган!
ЎҚИНГ: Samsung энг арзон 5G-смартфони – Galaxy A42 5G моделини намойиш этди!
Realme V3 русумли ушбу қурилма бешинчи авлод уяли алоқа тармоғини қўллаб-қувватловчи MediaTek Dimensity 720 платформаси базасида ишланган. Гарчи ўзи арзон бўлса-да, мазкур смартфон 6/8 гигабайт ҳажмли LPDDR4x стандартидаги тезкор хотира, шунингдек, 64/128 ГБ ҳажмли UFS 2.1 тоифали доимий хотира чиплари билан таъминланган.
Қурилманинг яна бир ўзига хослиги – унинг «бели бақувват», яъни аккумулятори 5000 мА/соатлик бўлиб, 18 ваттлик тезкор зарядлашни қўллаб-қувватлайди.
Мазкур смартфонда IPS-матрицали, томонлари ўзаро 20:9 нисбатли экран қўлланган. Диагоналига 6,5 дюймлик дисплейда тасвир аниқлиги 1600х720 пикселга тенг; унинг томчисимон кемтигига 8 мегапикселлик олд камера жойланган.
Realme V3’нинг орқа қопқоғида бармоқ изи сканери, шунингдек, квадрат блокда бош камеранинг 13, 2 ва 2 мегапикселлик датчиклари ва фоточақноғи ўрин олган. Унинг ўзига хосликларидан бири – сониясига 60 кадр частотасида Full HD форматли видео ёзиб олишга қодир.
ЎҚИНГ: Интернетда видео кўрганда қанча мегабайтингиз сарфланишини биласизми?
Oppo Realme V3 смартфонининг тўлиқ техник хусусиятлари қуйидагича:
Дисплей: 6,5'', 1600x720 пикселлик
Процессор: MediaTek Dimensity 720
Тезкор хотира: 6/8 ГБ, LPDDR4x
Ички хотира: 64/128 ГБ, UFS 2.1
Бош камера: 13 МП (f/2.2) + 2 МП (макро, 40 мм.дан) + 2 МП (чуқурлик датчиги)
Олд камера: 8 МП
Аккумулятор: 5000 мА/соатлик, 18 Вт
Алоқа: 5G, Wi-Fi 802.11ac, Bluetooth 5.0, GPS, ГЛОНАСС
Операцион тизим: Android 10 + Realme UI
Ўлчами: 164,4 х 76 х 8,6 мм
Вазни: 189,5 грамм
Компания Realme V3 моделини кўк ва оқ тусли корпусларда, 9 сентябрдан сота бошлайди. Уни тезкор/доимий хотира ҳажмига кўра уч хил вариантда таклиф этишади ва нархлари қуйидагича: 6/64 ГБлиги – 146 доллар, 6/128 ГБлиги – 205 доллар ва 8/128 ГБлиги – 237 доллар.
Айтиш керакки, айни дамда Realme V3 дунёда энг арзон 5G-смартфон бўлиб турибди, энди эса юриш навбати Redmi брендида!
ЎҚИНГ: Атиги 128 долларга уч камерали, 6000mAh батареяли ва ўйинбоп процессорли смартфон чиқди!
