Red Magic 7 ва Red Magic 7 Pro смартфонлари тақдим этилди
Red Magic 7 Pro смартфони экраности селфи камерасига эга бўлган илк ўйинбоп смартфон бўлди. Янада қизиқ томони шундаки, у 135 ваттда қувват олиши мумкин. Nubia, шунингдек, ўйинлар учун иқтисослашган Red Core 1 чипини ушбу смартфонга жойлади.
ЎҚИНГ: Snapdragon 8 Gen1 чипи билан жиҳозланган Redmi K50 Gaming тақдим этилди
Янги ICE 8.0 совутиш тизими қурилманинг асосий кучи бўлиб, унга дақиқасига 20,000 марта айланувчи паррак ўрнатилган. Совутиш тизими эса иккинчи ҳаво туйнуклари билан бирлаштирилган.
Аввалги моделлардаги тизимга қараганда, янги совутиш тизими ҳаво оқимини 35% га тезлаштиради. Бу эса чипсет ҳароратини яна 3ºC градусга пасайтиришга имкон беради. Буларнинг барчаси Snapdragon 8 Gen1 чипини қизиб кетишини олдини олиб, CPU ва GPU'нинг бор имкониятларини намойиш қилишга қаратилган.
Иккала модель ҳам 1080 х 2400 резолюциядаги 6.8 дюймли АМОЛEД дисплейи билан жиҳозланган. Дисплей бир хил бўлгани билан унинг айрим техник жиҳатлари икки смартфонда турлича. Мисол учун, Pro модель дисплейининг ўртача ёрқинлиги 700 нитни, оддий моделники эса 600 нитни ташкил қилади.
Энг муҳими шундаки, Pro модель 120Hz экран янгиланиш частотаси ҳамда 960Hz сенсорли намуна олиш частотасини қўллаб-қувватласа, оддий моделнинг дисплейи 165Hz экран янгиланиш частотаси ва 720Hz сенсорли намуна олиш частотасида ишлайди.
Қурилма ромидаги ўйин ўйнашга мўлжалланган триггерлар ҳам такомиллашди. Энди уларнинг жавоб реакцияси 500 гертсга етди. Ушбу триггерларни бошқариш овоз, вибрация ва ўйин ёруғлик эффектларини назорат қилувчи Red Core 1 чипи зиммасига тушади.
Шуни таъкидлаш зарурки, Red Magic 7 Pro модели экраности селфи камера эга. Бундан олдин ҳеч бир ўйинбоп смартфонга бундай турдаги селфи камера ўрнатилмаган эди.
Red Magic 7 модели эса оддий селфи камерага эга. У экраннинг юқори рамкасидан ўрин олган. Шунингдек, янги Red Magic Studio иловаси орқали ўйинларни 120 гертсда ( H.264 1080p форматда) ёзиб олиш мумкин.
Иккала смартфон Android 12 операцион тизимига асосланган Red Magic 5.0. график қобиғида ишлайди. Red Magic Game Space эса триггер, смартфон унумдорлиги ҳамда аккумулятор автономлигини созлаш учун ҳизмат қилади.
Pro модель 135 ваттда қувват олиши сабабли ҳаво кулерининг бу ерда аҳамияти юқори. Ушбу кучланиш билан смартфон 5,000 мАс сиғимли аккумуляторни 15 дақиқада тўлдириши мумкин. Совутиш парраклари ушбу жараёнда смартфоннинг қизиб кетишини олдини олади.
Red Magic 7 эса 120 ваттда қувват олувчи 4,500 мАс сиғимли аккумуляторга эга. Тўлиқ қувватланиш учун ушбу модель 17 дақиқа вақт сарфлайди.
Иккала қурилманинг қутисида 165 ваттлик адаптери бўлади. Шундай қилиб у билан смартфондан ташқари ноутбукларни ҳам зарядлаш мумкин.
Совутиш тизими ҳақида батафсил маълумот берадиган бўлсак, ундаги паррак жуда тез айланади. Шундай бўлса-да, у шовқинсиз ишлай олади. Узоқ муддат ўйин ўйналаганда смартфон унумдорлигини бир меъёрда ушлаб туриш учун совутиш тизими CPU ядролари ҳароратини 16ºC градусгача тушириб бериши мумкин.
Албатта, смартфон фақатгина совутиш парраклари билан чекланиб қолмайди. Қурилмадаги ICE 8.0 тизими иссиқликни тарқатувчи тўққиз қатламли совутиш структурасига эга.
Бундан ташқари, смартфонларга қўшимча Turbo кулерни ҳам ўрнатиш мумкин. Бу эса иссиқлик тарқатишни 17% га яхшилайди.
Red Magic 7 модели Cyber Neon, Night Knight ва Deuterium Transparent Edition версияларида чиқарилади. Cyber Neon ва Night Knight версияларида Red Magic логотипи RGB ёритгичи билан ёритилади. Deuterium Transparent Edition версиясининг логотипи билан бир қаторда совутиш парракларига ҳам RGB ёритгичи қўшилган.
Red Magic 7 Pro модели ҳам Cyber Neon, Night Knight ва Deuterium Transparent Edition варсияларида тақдим қилинди. Унинг ёритиш техникаси оддий моделники билан бир хил.
Иккала моделга олдиндан буюртма бериш кечадан бошланди. 21 февраль санасида қурилмалар сотувга чиқади. Шунингдек, икки моделнинг глобал версияси 22 февралда тақдим этилади ва уларнинг сотув жараёнлари 10 мартдан бошланади. Ҳозирча фақат Хитой учун ишлаб чиқарилган смартфонларнинг нархи маълум.
Red Magic 7
8/128ГБ - 630 доллар
12/256ГБ - 775 доллар
Red Magic 7 Pro
12/128ГБ - 740 доллар
12/256ГБ - 837 доллар
18ГБ/1ТБ - 1185 доллар
Янги Turbo кулерининг тахминий нархи 31 доллар бўлса, унинг магнитли турининг нархи 47 долларни ташкил қилади.
ЎҚИНГ: realme 9 Pro ва realme 9 Pro+ смартфонлари тақдим этилди
