Redmi 6 ва 6A’нинг Xiaomi яширган асосий камчилиги фош бўлди!
Жорий йилнинг 12 июнида Xiaomi компанияси ўзининг иккита янги ҳамёнбоп смартфони – Redmi 6 ҳамда 6A моделларини расман намойиш этган эди. Тақдимот маросимида бу қурилмаларнинг бир қатор техник жиҳатлари айтилганки, уларнинг кўплиги боис телефонлардан битта муҳим датчик «олиб ташланган»лигини ҳеч ким пайқамай ҳам қолган.
ЎҚИНГ: "Ақлли камера"ли Redmi 6 тақдим қилинди
Яъни, Redmi 6 ва Redmi 6A моделлари ўз «издош»ларида мавжуд бўлган муҳим бир датчик – инфрақизил портдан маҳрум этилган. Табиийки, мазкур датчик билан боғлиқ бўлган кўплаб функциялар ҳам бу смартфонларда мавжуд эмас.
Таъкидлаш керакки, Xiaomi смартфонлари бир неча йиллардан бери инфрақизил порт билан жиҳозланиб келади. Шунинг шарофати билан фойдаланувчилар турли маиший техника жиҳозларини телефоннинг ўзиданоқ бошқара олишарди. Жумладан, бунақа смартфонни бир вақтнинг ўзида телевизор, кондиционер ва бошқа жиҳозлар учун бошқарув пульти тарзида ишлатса бўлади.
ЎҚИНГ: Redmi 6A: Xiaomi'нинг энг арзон янги смартфони
Лекин «хитойча Apple» ҳамёнбоп Redmi смартфонларининг олтинчи авлодига келиб ушбу интерфейсдан воз кечганлиги яхши иш бўлмади. Ва ундан ҳам қизиғи – тақдимот маросимида Xiaomi янги смартфонларда инфрақизил портнинг олиб ташланганлиги ҳақида лом-мим демаган!
Қизиқ, мазкур корпорация бозорда бирмунча ўз ўрнига эга бўлиб, смартфонлари билан ишонч қозониб олгач, секин-асталик билан айёрлик қилишга ўтяптимикан? Дарвоқе, «хитойча Apple» яширган яна битта сир ҳам ўтган ҳафта ошкор бўлган ва бу ҳақда биз хабар берган эдик.
ЎҚИНГ: Xiaomi кўрсатмаган Redmi 6 Pro’нинг ёқиқ ҳолдаги суратлари кўп нарсани фош этди
