Redmi 855’га қарши ҳамёнбоп Realme X, Realme X Lite ва Realme X Pro флагманлари жангга тайёр!
Xiaomi компанияси Snapdragon 855 чипли, камераси корпусдан чиқувчи арзон Redmi флагманини ҳали тақдим этгани йўқ, аммо унинг ваҳимаси катта. Oppo эса айни шу бренд билан беллашиш учун ташкил этилган Realme туркумида унга рақобатчи флагманни тайёрлаб улгурди.
ЎҚИНГ: Redmi 7’дан аввал унинг «кушанда»си – арзон, аммо «бели бақувват» Realme 3 тақдим этилди!
Манбаларга кўра, Oppo яқин орада Хитойда флагман туркумига мансуб Realme X смартфонларини тақдим этади. Компания майдалашиб ўтирмасдан, бирйўла Realme X, Realme X Lite ҳамда Realme X Pro моделларини намойиш қилмоқчи.
Хабарингиз бор – Realme бренди аслида Ҳиндистон бозорига мўлжалланган, аммо Oppo унинг муваффақиятли юришини Хитойда ҳам амалга оширмоқчи. «Осмон ости салтанати»да стандарт Realme X ҳамда нисбатан арзон Realme X Lite тақдимотдан кейин – май ойидаёқ савдога чиқиши мумкин. Янада илғор Realme X Pro эса бозорга сал кейинроқ тақдим этилади.
Инсайдерларнинг таъкидлашларича, Realme X Lite номи остида яқинда Ҳиндистонда чиқарилган Realme 3 Pro модели тақдим этилади. Уни бироз яхшилашадими ёки шунчаки бошқа ном билан чиқариб қўяверишадими – буниси ҳозирча номаълум.
ЎҚИНГ: Realme 3 Pro намойиш қилинди: Redmi Note 7 Pro’нинг жиддий рақиби!
Realme X моделига келсак, уни Qualcomm компаниясининг янги чипи – Snapdragon 730 процессори билан таъминлашади. Тезкор ва ички хотира ҳажмига кўра турли вариантларга эга бу смартфоннинг олд камераси корпус ичидан чиқадиган бўлади. Унинг қўшалоқ бош камераси эса 48 ҳамда 5 мегапикселлик датчикларни ўз ичига олади.
Ва ниҳоят, янги туркумнинг энг илғор вакили – Realme X Pro эса флагман процессор – Snapdragon 855 базасида ишлайди. Унинг бошқа техник хусусиятлари стандарт Realme X моделига ўхшаш бўлиши кутилмоқда.
Агарда Realme смартфонлари Хитойда ҳам тақдим этилса ва сотувга чиқса, эҳтимол, Ўзбекистонда уларни AliExpress савдо майдончаси орқали харид қилиш имкони туғилар. Турли русумлардаги Xiaomi телефонларини эса аллақачон 585 000 сўмдан бошланувчи нархларда Terashop.uz интернет-дўконимиздан сотиб олиш имкони бор.
