Redmi Note 12 Pro Speed Edition - бунисига нима дейсиз?

Redmi Note 12 Pro Speed Edition - бунисига нима дейсиз?

Redmi Note 12 серияси шу йилнинг октябрь ойида дебют қилган бўлиб, унда жами тўртта: Redmi Note 12, Note 12 Pro, Note 12 Pro+ ҳамда Note 12 Discovery моделлари тақдим этилган эди. Энди серияга бешинчи модель - Redmi Note 12 Pro Speed Edition ҳам қўшилди. 

Номига қараб Speed Edition оддий Pro моделга нисбатан тезроқ заряд олади деб ўйлашингиз мумкин. Аммо вазият бироз бошқачароқ. Speed Edition худди Pro модель каби 67 ваттда қувват олади. Шунингдек, аккумулятор ҳажми ҳам бир хил - 5,000 мАс. 

Дизайн жиҳатидан Note 12 Pro Speed Edition ва Note 12 Pro моделлари деярли бир хил. Фақатгина янги моделининг камера дизайни бироз ўзгарган. Redmi бренд ёзуви пастки қисмдан тепа қисмга олиб ўтилган. Бу уни кўпроқ Poco моделларига ўхшаб қолишига сабаб бўлган. Балки келажакда Хитойдан бошқа бозорларга ушбу смартфон Poco номи остида сотувга чиқар.

Speed Edition аккумулятор ҳамда корпус ҳажми бўйича оддий Pro моделдан фарқ қилмаса-да, унинг оғирлиги Note 12 Pro'дан 6 граммга енгилроқ - 181 грамм. Асосий фарқлар эса камера ва чипсетда учрайди. Redmi Note 12 Pro модели 50МП асосий камера ҳамда Dimensity 1080 чипи билан жиҳозланган бўлса, Note 12 Pro Speed Edition модели 108МП Samsung ISOCELL HM2 сенсорли асосий камера ҳамда Snapdragon 778G чипи билан жиҳозланган. Асосий камера оптик стабилизацияга эга эмас. Унинг олдидан 8МП ультракенг ва 2МП макро камералар ўрин олган. 

Қурилманинг қолган техник кўрсаткичларига тўхталадиган бўлсак, у 120 геэтс частотада ишловчи FullHD+ сифатидаги OLED дисплей, 16МП селфи камера, ён томонда жойлашган бармоқ изи сканери, NFC, 5G, 3.5 мм аудио жек, Dolby Vision, стерео динамик, X-axis двигатели ҳамда IP53 стандартига эга. 

Note 12 Pro'дан фарқли ўлароқ, янги модель Android 13 операцион тизимига асосланган янги MIUI 14 график қобиғида ишлайди. Қурилманинг кўк яшил ва қора ранглари, шунингдек, 6/128ГБ, 8/256ГБ ҳамда 12/256ГБ хотира турлари бўлади. 

Нархлар эса қуйидагича:

6/128ГБ - 245 доллар

8/256ГБ - 260 доллар

12/256ГБ - 285 доллар 

Redmi Note 12 Pro Speed Edition модели Хитойда Xiaomi'нинг расмий веб-сайти орқали сотилади. Ҳозирча унинг халқаро бозорга сотувга чиқиши ҳақида ҳеч қандай маълумот йўқ. 

ЎҚИНГ: Расман: Redmi K60 серияси тақдим этилди 

Хабарларни тез ва осон ўқиш учун Андроид иловамизни сақлаб олинг.