Redmi Note 5: "идеал ҳамёнбоп" тақдимотга тайёр
Xiaomi компанияси Redmi Note туркумида янги смартфон моделларини тақдим қилишда давом этади. Тақдимот навбати Redmi Note 5 смартфонига келди.
Маълумотларга кўра, ишлаб чиқарувчи тақдимотда биратўла 2 та смартфонни намойиш қилади: Xiaomi Redmi Note 5 ва Redmi Note 5A. Аввалига барча инсайдерлар Redmi Note 5 қадоқдаёқ Xiaomi'нинг яп-янги MIUI 9 интерфейсига эга бўладиган компаниянинг илк мобил телефони бўлишини айтган эдилар. Бироқ, ўтган ҳафтада тақдим қилинган Mi5x чаққонлик қилди. Демак, Redmi Note 5 Android 7.1.1 Nougat'нинг ўзлаштирилган MIUI 9 тизимида ишлайдиган навбатдаги "сяоми" бўлади.
Бизга маълум хабарларга кўра, Redmi Note 5 янги ва илғор, ўрта нархли смартфонларга мўлжалланган Snapdragon 630 аппарат платформаси, 5,5 дюймли FullHD‑экран, 3790 мА соат сиғимли аккумулятор, 13 мегапикселли олд ва 16 мегапикселли орқа камера, 32/64 Гб доимий хотирага эга бўлади. Бош камерада 2 карралик яқинлаштириш функцияси жорий қилинади. Унинг тезкор хотира сиғими 3/4 гигабайтни ташкил қилади. Девайснинг бошланғич жиҳатларга эга талқини учун сўралаётган нарх инсоф доирасида — $149.
Юқори талқиндаги Redmi Note 5'нинг янада кучли Snapdragon 630 чипи билан таъминланиши кутилмоқда. Унинг нархи $221 долларгача кўтарилади.
Компания 2016 йилда намойиш қилган Redmi 4A, Redmi 4 ва Redmi 4 Prime смартфонлари орасида Redmi 4A энг "камтар" жиҳатларга эга бўлган. Бу гал эса бу камтарлик Redmi Note 5А'га насиб қилган: 5,5 дюймли экран, 4 Гб "оперативка" ва 64 Гб доимий хотира. Бироқ девайснинг қўш объективли бош камера (OmniVision брендининг кенг бурчакли ва телефото сенсорлари)га эга бўлиши ҳақидаги маълумотлар ҳайратланарли.
Xiaomi Redmi Note 5 ва Redmi Note 5A QuickCharge 3.0 тезкор қувватлаш технологиясини қўллаб-қувватлайди.
Xiaomi яқиндагина янги гаджетни намойиш қилганини ҳисобга олсак, Redmi Note 5'ни август ойи ўрталарида кутиш мақсадга мувофиқ.
