Redmi Note 7 чиндан ҳам «ёнғоқчақар»ми? JerryRigEverything «жонли» видеотестини томоша қиламиз!
Xiaomi компанияси энг фаол реклама қилган арзон моделлардан бири Redmi Note 7 бўлди. Ҳамёнборлигидан ташқари, унинг корпуси чидамлилиги кўпроқ эътиборга сазовор бўлмоқда.
ЎҚИНГ: Xiaomi’нинг янги рекорди: Redmi Note 7 битта кўрсаткич бўйича барча iPhone’лардан ошиб кетди!
Мустаҳкамлиги боис «Кичкина Кинг-Конг» деб ҳам аталган ушбу смартфонни турли видеоларда йигитлар полга ташлаб тепкилаб, қиз нозик пошнасида эзғилаб, дўмбоқ йигит устига сакраб ўтириб ва яна экрани билан ёнғоқ чақиб, дисплейи устида турли маҳсулотларни ошпичоқда чопиб, ҳатто сув тубида ҳам ишлатиб ҳам кўрсатишган. Шунингдек, Redmi Note 7’нинг ичини очиб, қисмларга ажратиб кўрсатилган, яна мустаҳкамлиги металл зўлдир ва дрель остида, калит тўла қути ичида синалган видеоларини ҳам чиқарганмиз.
Смартфонлар дроп-тестлари, уларнинг ичини очиб кўришлар йўналиши бўйича энг машҳур видеоблогерлардан бири Зак Нельсон (Zach Nelson) ҳисобланади. У ўзининг JerryRigEverything каналида кўплаб телефонларнинг мустаҳкамлик тестларни эълон қилган. Ниҳоят, влогернинг қўлига Redmi Note 7 смартфони ҳам етиб келди ва уни текшириб, видеосини чиқарди.
ЎҚИНГ: 2018 йилнинг энг, энг, энг... смартфонлари (JerryRigEverything видеоталқини)
Бир сўз билан айтганда, Redmi Note 7 модели Xiaomi мақтаганичалик бақувват эмас экан. Унинг металл роми ҳам, дисплейи ҳам букилади ва осон синади.
Шу тариқа, «Кичкина Кинг-Конг» зарбага чидамлилик борасида ўз нарх тоифасидаги рақибларидан устун келса-да, кўпчилик замонавий смартфонлар ўта оладиган букиш синовида шарманда бўлган.
Хулласи калом, ўзингиз кўрмасангиз бўлмайди буни:
Эслатиб ўтамиз, Redmi Note 7 моделини Ўзбекистонда ҳозирча фақат AliExpress’дан буюртма орқали сотиб олиш мумкин. Жаҳон бозорига чиқарилган айрим Xiaomi смартфонларини эса 819 000 сўмдан бошланувчи нархларда Terashop.uz интернет-дўконимиздан харид қилиш имкони бор. Айниқса, шу кунларда – акция доирасида бу харидингиз янада ёқимли ва манфаатли бўлади.
