Redmi Note 7 MIUI 11'га режадагидан олдинроқ ўтадиган бўлди

Xiaomi ёзда бир неча смартфон Android Q ва MIUI 11'га биринчи босқичда ўтишини маълум қилган эди. Янги операцион тизим ва интерфейсда ишлаши ваъда қилинган қурилмалардан бири Redmi Note 7 смартфони эди. MIUI форумларидаги манбаларнинг хабар қилишича эса, Xiaomi бу янгиланиш устидаги ишларни аллақачон бошлаб юборган.

Айни дамда Хитойда Redmi Note 7 учун Android 10 асосидаги MIUI 11'нинг ёпиқ бета синовлари амалга оширилмоқда. Тизимдаги асосий камчиликлар тузатилиб, интерфейснинг бета талқини фойдаланувчиларга тақдим қилингунга қадар уч ҳафтагача вақт кетади. Мана шу муддатдан бошлаб эса саккиз ҳафтагача оралиқда барқарор прошивка жорий қилиниб, бутун дунёдаги мижозларга жўнатилади.

Аслида, Xiaomi'дагилар Redmi Note 7 ва Note 7 Pro учун барқарор прошивкани 2020 йилнинг биринчи чорагида жўнатишни режалаштирган эди. Бироқ ҳозирги ҳолатда апдейтнинг эртароқ келиши кутилмоқда. Янги чорак ўн уч кунда бошланади, аммо смартфонсознинг режадан олдин ҳаракат қилиши фойдаланувчилар учун ҳар доим яхши янгилик бўлади.

Қизиғи, Redmi Note 7/7 Pro'лар Android 10/MIUI 11'га Redmi Note 8/8 Pro'лардан олдин ўтиши мумкин. Лекин бу борада компаниядагилар ҳали расмий маълумот берганича йўқ.

ЎҚИНГ: Энг оммабоп Redmi смартфони «ғиштга айланиб» қоляпти, Xiaomi эса жим!