«Рекордчи ромсиз» Lenovo Z5 – инқилобий смартфоннинг ҳамёнбоп версиясини илк «жонли» суратларда кўрамиз!
Weibo ижтимоий тармоғида Lenovo компанияси тайёрлаётган смартфоннинг «жонли» суратлари тарқалди. AndroidPure ресурси уни ўша машҳур Lenovo Z5 модели, дея эълон қилган.
ЎҚИНГ: Инқилобий Lenovo Z5 илк расмий тизерларда: унчалик ҳам ромсиз эмас экан!
Бугун тақдим этилиши кутилаётган ушбу флагмани ҳақида хитойлик компания бир-биридан қизиқ маълумотларни битта-биттадан ошкор этган. Жумладан, шу пайтгача Lenovo Z5 номли бу смартфоннинг нақ 4 терабайтлик доимий хотирага эга эканлиги; мобил фотосуратчиликда бурилиш ясаётгани; ҳатто аккумуляторининг қуввати 0 фоизга тушганда ҳам ишлайвериши; битта тўла қувват билан 45 кунгача ишлай олиши; корпусининг орқа панели шишадан эканлиги айтилган ва олд панелини тўлалигича акс эттирган сурати чиққан.
Lenovo вице-президенти Чанг Чэн (Chang Cheng) эълон қилган рендерларда бу смартфоннинг айрим қисмлари кўрсатилган, уларга кўра, янги флагман экранида iPhone X услубидаги «кемтик» йўқ эди. Weibo тармоғида чиққан «жонли» фотосуратларда акс этган янги Lenovo смартфони эса экранида шундай «ўйиқ»қа эга.
Шунингдек, экраннинг пастида яхшигина ром кўзга ташланади.
Орқа панелида қўш камеранинг объективлари тикка жойлашган, фоточақноқ эса улардан пастда:
Булардан ташқари, смартфон экранидан олинган скриншот унинг анча оддий хусусиятларга эга эканлигини кўрсатмоқда. Шундан келиб чиқиб айтиш мумкинки, бу – Lenovo Z5 флагмани билан битта туркумда тақдим этиладиган, унинг арзонроқ талқини бўлса керак.
Ушбу модел Qualcomm Snapdragon 636 процессори, 4 ГБ тезкор ва 64 ГБ доимий флеш-хотирага эга бўлиб, Android операцион тизимининг 8.1 Oreo талқини бошқаруви остида ишлайди.
Нима бўлганда ҳам, яқин орада барчасига ойдинлик киритилади, воқеалар ривожини биз билан бирга кузатинг.
ЎҚИНГ: 1 терабайт нима бўпти!? Lenovo Z5 – нақ 4 терабайт хотирали илк смартфон!
