Рекордчи ромсиз смартфон – OPPO Find X илк видеода кўринди!
Хитойнинг таниқли ва энг кўп смартфон сотувчи компанияларидан бири саналмиш OPPO ўзининг янги флагмани – Find X тақдимотини 19 июнга белгилаган. Париждаги Лувр музейида бўлиб ўтувчи расмий намойишдан аввал унинг реклама ролиги интернетга чиқиб кетди.
ЎҚИНГ: Find X флагмани хусусиятларини OPPO расман маълум қилди
Мазкур видеолавҳа бир неча сониягина давом этади, аммо шу муддат мобайнида ҳам смартфон дизайнини кўриб, у ҳақда тасаввур ҳосил қилишга улгурамиз. Унга кўра, OPPO Find X корпусининг олд юзасини бутунлай экран қоплаб олган. Ромсиз дисплейнинг бурчаклари думалоқланган, унинг пастидагина юпқагина ҳошия кўзга ташланади.
Смартфоннинг орқа панели намойишига эса бир сониядан ҳам кам вақт ажратилган, лекин шундаям орқа қопқоқнинг янгича дизайни ҳамда ундаги қўшалоқ асосий камера эътиборни тортади.
Мана, OPPO Find X реклама ролигини бирга томоша қиламиз:
Find X смартфони энг илғор техник жиҳатлар билан таъминланиши ҳақида аввал ҳам ёзганмиз. Snapdragon 845 процессори, беш каррали оптик зумга эга қўш камера, аккумуляторни саноқли дақиқаларда тўлдирувчи Super VOOC технологияси шулар қаторидадир.
Шунингдек, юқорида тақдим этилган видеолавҳадан келиб чиқадиган бўлсак, OPPO Find X экраннинг ромсизлиги бўйича рекордни янгилайдиган кўринади. Ҳозирча эса, яқиндагина намойиш этилган инновацион Vivo Nex смартфони дисплейнинг олд панелга нисбати бўйича тенгсиз бўлиб турибди.
