Ривожланган давлатларда интернет тезлиги қандай?
Бугунги кунга келиб интернет тезлиги норасман бўлмаса ҳам, турмуш даражасини белгиловчи омиллардан бири бўлиб қолгани ҳеч кимга сир эмас.
Март ойи ҳолатига кўра, Ўзбекистон бутун дунё давлатлари орасида интернет алоқаси тезлиги борасида 7 поғона кўтарилгани ҳақида хабар берган эдик. Мамлакатда симли интернет тезлиги 26,92 Мбит/сек (176 та давлат орасида 95-ўрин), мобил интернет тезлиги эса 10,07 Мбит/сек бўлган (141 та давлат орасида 133-ўрин).
Келинг, энди эътиборимизни дунёнинг энг ривожланган давлатларига қаратамиз. Бунинг учун Г8 давлатлари: Франция, АҚШ, Буюк Британия, Россия, Германия, Япония, Италия ва Канадаларни танладик. Speedtest эълон қилган натижаларга таянган ҳолда, бу ерда март ойидаги симсиз мобил ва симли интернет тезлигини таққослаймиз.
Францияда кенг палосали симли интернетдан фойдаланиб, сониясига 136,45 Мбит тезликда маълумот алмашишингиз мумкин. Бу кўрсаткич билан ушбу давлат рейтингда еттинчи ўринда турибди. Француз мобил операторлари тақдим қилган ўртача тезлик эса 43,04 Мбит/секунд бўлган (28-ўрин).
Симли интернет борасида топ ўнталикка кира олмаган Қўшма Штатларда тезлик 132,55 Мбит/сонияни ташкил қилган бўлиб, ушбу натижа билан мамлакат 11 ўринни банд қилган. Симсиз мобил интернет тезлиги эса АҚШ 41,68 Мбит/секунд — 32-ўрин.
Буюк Британиянинг симли интернети кўрсаткичлари яхши бўлсада, юқоридаги икки давлатникидан анчайин паст. Тезлик — сониясига 66,99 Мбит. Мобил интернет эса 35,39 Мбит/сек (44-ўрин).
46 ўринни банд қилган Россиянинг симли интернетидан фойдалансангиз, тезлигингиз 64,57 Мбит/сония бўлади. Мобил интернет кўрстакичлари бўйича мамлакат анчайин қуйида — 20,16 Мбит/сек, 92-ўрин.
Германия эса топ 30 таликка кирган. 94,73 Мбит/секунддаги кенг палосали интернет мамлакатга 31 ўринни келтирган. Мобил интернет ҳам анчайин тез: 37,31 Мбит/сек тезлик билан 37-ўрин.
Японлар нафақат ўзининг технологияси, балки кенг палосали интернети билан ҳам мақтанса арзийди. Рейтинг: 27. Тезлик: 100,56 Мбит/секунд. Аммо мобил интернет тезлиги камроқ экан. 37,75 Мбит/сек, 42-ўрин.
54 ўринни банд этган Италия 55,19 Мбит/секунд тезликдаги симли интернетга эга бўлган. Италияликларнинг мобил интернети ўртача 30,30 Мбит/секунд ишлаган. Рейтингдаги ўрин: 58.
Рўйхатнинг етакчиларидан бўлган Канадада эса операторлар тақдим қилган тезлик ўртача 120,98 Мбит/секундни ташкил қилган бўлиб, бу мамлакатга 17 ўринни берди. Мобил интернет ҳам анча тез — 73,16 Мбит/секунд (5-ўрин).
Симли интернет тезлиги бўйича бутун дунё бўйлаб тармоқдан юклашнинг ўртача тезлиги 74,64 Мбит/секунд, тармоққа юклаш тезлиги эса 40,07 Мбит/секундни ташкил қилган. Кечикиш 40 миллисекунд бўлган. 176 та давлат орасида Сингапур биринчи (197,26 Мбит/секунд), Туркманистон эса охирги ўринда (1,89 Мбит/сек).
Мобил интернет тезлиги бўйича глобал умумий кўрсаткич 30,47 Мбит/сек (тармоқдан юклаш) ва 10,73 Мбит/сек (тармоққа юклаш) бўлган; кечикиш вақти — 42 миллисекунд. БААда тезлик энг юқори бўлса (83,52 Мбит/сек), Афғонистонда энг секин бўлган (6,01 Мбит/сек).
