Ромсиз Doogee Mix’ни $200 доллардан харид қилишга нима дейсиз?

Бир муддат аввал Хитойнинг ёш Doogee компанияси Mix номли янги ромсиз смартфон тайёрлаётгани ҳақида хабар тарқалган эди. Жаҳондаги илк ромсиз смартфон — Xiaomi Mi MIX флагманидан илҳомланиб яратилган гаджетнинг нархи рақибиникидан анча-мунча арзон. Бугун интернет тармоғида эълон қилинган маълумотларга кўра, Doogee Mix 2017 йилнинг май ойида $200 доллардан сотувга чиқарилади.

Бу пулга компания Xiaomi Mi MIX’га ўхшаш, яъни 8 мегапикселли олд камераси олд панелнинг қуйи қисмидан ўрин олган, биометрик сканери бош меню тугмасига ўрнатилган, 16 МП бош камерага эга смартфонни ваъда қилмоқда. Doogee Mix матрицаси Super AMOLED бўлган 5,5 дюймли дисплей, 64 битда ишлайдиган 8 ядроли Helio P25 чипсети, 4/6 Гб оператив ҳамда 64 ёки 128 Гб доимий хотира билан таъминланган. Шу билан бирга, Doogee Mix’нинг 10 ядроли Helio X30 процессорига эга талқини ҳам сотувга чиқарилиш мумкин.