«Роскачество» энг яхши смартфонларни эълон қилди

Мобил қурилмалар бозори кескин кенгайиб бормоқда. Бу ерда ҳар ким чўнтаги ва дидидан келиб чиқиб хоҳлаганча янги гаджетларни харид қилиши мумкин. Россиянинг маҳсулотлар сифатининг назоратига масъул «Роскачество» идораси айни пайтда мамлакатда сотилаётган бир неча юзлаб смартфон моделларини синовдан ўтказиб, энг яхшиларини харид учун фуқароларга тавсия қилди.

Россиялик экспертларга кўра, Samsung Galaxy S8 Россияда йилнинг энг яхши смартфони деб топилган. Иккинчи ўрин эса Samsung Galaxy S7, учинчи ўрин – Samsung Galaxy S8+ флагманига насиб қилган. Тўртинчи ўринга ҳам кореялик ишлаб чиқарувчининг маҳсулоти муносиб кўрилган – Samsung Galaxy Note 8. Ниҳоят "кучли бешлик"ка Apple iPhone 8 Plus, ундан сўнгги ўринда Apple iPhone 8 турибди.

Еттинчи ўрин LG G6, ундан кейинги ўрин Samsung Galaxy S6 Edge флагманларига насиб қилган.

Шунингдек, россияликлар харид қилиши мумкин бўлган энг муносиб смартфонлар ўнлигини iPhone 6 Plus ва iPhone 6 якунлаган. Улардан сўнг Samsung Galaxy S7 Edge, Samsung Galaxy S6 каби аввалги моделлар турибди.

Кўриниб турибдики, россиялик экспертларнинг фикрича, Apple ва Samsung компаниялари смартфонлари мамлакат смартфон бозоридаги муносиб брендлар. Улардан кейинда LG компанияси ҳам бор.

Яна шу томони ҳам борки, ҳозирча «Роскачество» HTC U11+, OnePlus 5T, Apple iPhone X, Razer Phone, Google Pixel 2 XL ва 2017 йилнинг бошқа ўнлаб муносиб флагманларнинг сифати юзасидан муносабатини билдирмаган. Шу билан бирга, бу идора Россия ҳудудида расман сотиладиган смартфон моделларини текширувдан ўтказади.