Россия тижорат банки раҳбари хакерлар ўғирлаган 35 млн рублни беписандлик билан эълон қилди
Жорий йил аввалидан эътиборан хакерлар ВТБ банкидан 35 миллион рубль ўғирлаганлар, айни пайтда, ВТБ банки раҳбари Андрей Костиннинг сўзларига кўра, йил сайин банкнинг йўқотишлари ҳажми камайиб бормоқда.
Rambler News Service агентлиги А.Костиндан қуйидаги иқтибосни келтиради: “Менимча, бу йил 35 миллион (рубль ўғирлашди)”. “Интерфакс” эса Андрей Костиннинг ушбу сўзларини келтириб ўтади: “Ўғирланган пуллар ҳажми йил сайин камайиб боряпти. Бу бизга жиддий зарар келтираётгани йўқ, бироқ бундай ҳолат таҳдидлар йўқ дегани эмас. Бу борада ҳаракат ва уринишлар кузатиляпти”.
Ҳозирда молиявий секторда “кибержиноят тўлқини” фаоллашгани кузатилмоқда. Бу эса унга қарши кураш чораларини кучайтиришни талаб қилади, – дея қўйимча қилган Костин. “Биз замонавий воситалар, технологиялар ёрдамида пулларни ўғирлашга қаратилган кибержиноят тўлқини билан тўқнаш келяпмиз. Шунинг учун вазифамиз ўта долзарб, жиноятларнинг ҳажми ва сони кескин ошиб бормоқда” (РИА “Новости”дан иқтибос).
ВТБ банки раҳбари сўзларига кўра, истиқболдаги фаолият стратегияси йўналишлари белгилаб олинган. Биринчи йўналиш ¬– “Кибержиноятчиликка қарши курашда ягона стандартлар, ягона ёндашувлар ва технологиялар ишлаб чиқилиши учун ўзида давлат органлари, энг аввало, Марказий банк, Алоқа вазирлиги, ҳуқуқ-тартибот органлари ва банк тизимини бирлаштирган марказлашган тизимнинг зарурлиги”.
Иккинчи йўналиш – Россияда мавжуд қонунчиликни такомиллаштириш. “Одамлар бу масалага бир ножўя қилинган иш дея қарашади ва кўп ҳолларда шартли равишда жазоланишади”, – дейди ВТБ банки раҳбари.
“Ҳатто кенг миқёсда фойдаланиладиган атамалар ҳам мавжуд эмас. Шу сабабли бугунги кунда аксарият ҳолларда кибержиноятчилар жавобгарликка тортилмай қолмоқдалар. Қолаверса, жамоатчилик фикрида ҳам бу нақадар катта хавф экани ҳақида аниқ тушунча шаклланмаган”, – дея қўшимча қилган Костин.
