Россияда «Маруся»ни «Капсула»га солиб сота бошлашди!
«Яндекс» компанияси Россиянинг илк интеллектуал овозли ёрдамчиси – «Алиса»ни 2017 йилдаёқ тақдим этган эди. Кейинроқ эса Mail.ru Group унинг рақибаси – «Маруся»ни ишлаб чиққан.
ЎҚИНГ: Бунақаси бўлмаган: «Алиса»га 22 миллион мартадан ошиқ севги изҳор қилишибди!
Mail.ru Group куни кеча ўзининг «ақлли» колонкаси учун олдиндан буюртма ола бошлади. «Капсула» деб номланган мазкур гаджетга «Маруся» овозли ёрдамчиси ҳам жорий этилган. Ушбу жуфтлик рақобатчи компаниянинг «Алиса» ёрдамчисига эга бўлган «Яндекс.Станция» колонкаларига жавобдир.
«Капсула» учун 6 990 рубль (тахминан 112 АҚШ доллари) ҳажмида нарх белгиланган бўлиб, уни қора ёки кул ранг корпусда сотиб олиш мумкин. Ҳадя сифатида эса «ВКонтакте» тармоғида мусиқага уч ойлик обуна тақдим этилади. Колонкани 2020 йилнинг биринчи чораги охиригача очиқ сотувга чиқариш режалаштирилган.
ЎҚИНГ: AliExpress’нинг сир тутилган «ақлли» қурилмаси илк «жонли» суратда!
Mail.ru Group‘нинг «ақлли» колонкаси ушбу тоифадаги девайслар учун одатий бўлган функцияларга эга – янгиликларни ўқиб беришу болаларга эртак айтиб беришдан бошлаб эслатмалар ва йўлда вақтни ҳисоблаб беришгача.
«Капсула» динамикларининг жами қуввати 30 ваттга тенг. Шулардан 25 ватти диаметри 76 миллиметр бўлган паст частотали динамикка, 5 ватти эса 20 миллиметрлик юқори частотали динамикка тўғри келади. Шунингдек, гаджетга нутқни таниб олиш учун олтита микрофон ўрнатилган. Унинг частоталар диапазони 50 дан то 20 000 герцгача.
Карнайнинг корпуси ўлчамлари 222х153х110 миллиметрга тенг, вазни эса 1,46 килограмм келади. Қурилма Bluetooth 5.0 LE, Wi-Fi (802.2 a/b/g/n/ac) ҳамда NFC модулларига эга.
ЎҚИНГ: «Елена» – «сунъий онг»ли виртуал телебошловчини қарши олинг! (+видео)
