Россияда “Миллий Twitter» ишлаб чиқилди
Маҳаллий дастурларни оммалаштиришга астойдил бел боғлаган россиялик мутахассислар нафақат мамлакат, балки бутун дунё бўйлаб кенг тарқаган «ВКонтакте», «Одноклассники» ва «Мой Мир»нинг муваффақиятидан сўнг Twitter нинг русча вариантини ишлаб чиқди. Хизмат Qewy деб номланди ва унга фойдаланувчилар катта қизиқиш билан қараяпти, деб хабар беради FlashSiberia агентлиги.
«Twitter — бу микроблог, биз эса блогерлар учун тўлақонли майдон яратдик», — дейди дастурчилар компанияси вакили Вячеслав Серпиков.
Маълумки, америкаликлар брендида чегара бор, яъни унда 140 та рамздан ортиғини ёзиш имкони йўқ. Руслар таклиф этаётган лойиҳада мингтагача рамзлардан фойдаланиш мумкин. Мутасадди вакилнинг қўшимча қилишича, компания хизмат фойдаланувчиларининг ёзишмалари хавфсизлигини таъминлаш мақсадида “Шифрланган маълумотларнининг криптографик протоколи”ни ишлаб чиқмоқда.
Мутахассис айни пайт “Русча Twitter” лойиҳасида қанча одам борлигини айтмаган бўлса-да, Qewy 6 мингга яқин фойдаланувчига эга, деб ёзади FlashSiberia.
“Нима учун ўтган ҳафта унга уланиш имкони бўлмади”, деган саволга “Бунга лойиҳа тўғрисида оммавий ахборот воситаларида эълон қилиниши билан рўйхатдан ўтувчилар сони кескин кўпайиб кетгани сабаб”, деб жавоб берган Серпиков. Қолаверса, яқин кунларда бу камчиликлар бартараф этилиб, изига тушиб кетишини таъкидлаган.
Компаниянинг яқин келажакдаги режаси—Россия ва мустақил давлат ҳамдўстлиги мамлакатлари ҳудудида ўз мавқеини топиш, мобиль иловасини яратиш.
