Россияда Telegram ишлаб кетди, аммо Роскомнадзор бундан бехабар!
Telegram мессенжери чатларнинг шифрлаш калитларини Россия махсус хизматларига бермаганлиги боис бу компания Роскомнадзор билан судлашиб юрганидан хабарингиз бор. Шу сабабли ҳам 2018 йилнинг 13 апрелидан буён Россия ҳудудида ушбу мессенжер блокланган.
ЎҚИНГ: Россияда Telegram блокланишининг асл сабаби ошкор бўлди
Аммо бугун – 28 август куни маълум бўлишича, ушбу мамлакатда Telegram мессенжерининг веб-версияси яна ишлаб кетган. Шу билан бирга, Telegram-каналларга йўлловчи ҳаволалар ҳам очила бошлаган. Telegram’нинг браузер версияси қайтадан ишлай бошлагани ҳақида дастлаб Twitter фойдаланувчилари хабар беришган.
Аммо t.me ҳамда web.telegram.org доменларининг блокдан чиқарилганлигини Роскомнадзор вакиллари расман рад этишган.
«Бу маълумот ҳақиқатга тўғри келмайди. Роскомнадзор Telegram борасида Москванинг Таган райони судининг қарори бажарилиши бўйича чоралар кўришда давом этади», – дейди Роскомнадзор матбуот хизмати.
Мазкур баёнотга қарамасдан, Россия Федерацияси ҳудудида тақиқланган сайтлар реестрида t.me домени жорий йилнинг 10 июлидан бери мавжуд эмас. Лекин Telegram’нинг айрим IP-манзиллари блокланган ҳолда қолмоқда.
Дарвоқе, куни кечагина ушбу мессенжернинг Android ҳамда iOS иловалари, шунингдек Telegram Desktop клиенти янгиланган эди.
ЎҚИНГ: Telegram узоқ кутилган муҳим функцияга эга бўлади
Айни дамда Telegram’нинг веб-талқини ҳамда расмий клиенти Россиядаги барча интернет-провайдерлар мижозларида ҳам барқарор ишламаяпти. Бу эса алоқа хизматларини тақдим этаётган компания томонидан чеклов қўйилганлиги билан боғлиқ бўлиши мумкин.
Лекин ташвишланишга ҳожат йўқ – агарда Telegram блокланса ҳам, унга iOS ёки Android-смартфондан кириш йўлларини мана бу, компьютер ва ноутбуклар орқали кириш усулларини эса мана бу ҳаволалар орқали ўтиб, ўрганиб олишингиз мумкин.
ЎҚИНГ: Россия махсус хизматлари Telegram анонимлигини бузиб кира олишди!
