Safari браузери Edge'ни ортда қолдириб, дунёдаги энг кўп фойдаланиладиган иккинчи компютер браузерга айланди

Microsoft компаниясининг Edge браузери ўтган йили Apple'нинг Safari'сини ортда қолдириб, дунёдаги энг кўп фойдаланиладиган иккинчи компютер браузерига айланган эди. Бироқ у фахрли ўринда узоқ қолмади – Safari ўз ўрнини қайтариб олди.

StatCounter платформасидан олинган маълумотларга кўра Apple'нинг Safari браузери жорий йилнинг апрел ойида 11.87% бозор улуши билан Microsoft Edge (11%)ни ортда қолдирган. Safari энди дунёдаги энг кўп фойдаланиладиган иккинчи компютер браузери бўлса, Edge худди шундай учинчи браузер.

Таъкидлаш жоизки, Safari браузери фақатгина Apple қурилмаларида топилади ёхуд у iPhone, iPad ва Маc'ларга ўрнатилган ҳолда келади.  

Биринчи ўрин эса, шубҳасиз, Chrome браузерига тегишли – у компютерлар учун браузерлар бозор улушининг ярмидан кўпи, аниқроғи 66.13 фоизига эга.

Дунё бўйлаб энг кўп фойдаланиладиган компютер браузерлари топ бешталиги қуйидагича:

1. Chrome – 66.13%
2. Safari – 11.87%
3. Edge – 11%
4. Firefox – 5.65%
5. Opera – 3.09%

Ўзбекистонда энг кўп фойдаланиладиган компютер браузерлари орасида на Safari, на Edge иккинчи ўринда туради. 2023 йил апрел ойи маълумотларига кўра уларнинг ўрнини Россиянинг Yandex браузери 9.21% бозор улуши билан банд қилган. Edge браузери эса 5.44% бозор улуши билан мамлакатимизда энг кўп фойдаланиладиган учинчи, Safari 2.24% бозор улуши билан тўртинчи компютер браузер ҳисобланади. Mozilla'нинг Firefox браузери эса 2.19% бозор улуши билан топ бешликни якунлаб беради. Биринчи ўринми? Қайси браузер эканлигини ўзингиз яхши биласиз (Chrome – 78.38%).